رۆژانە لە عەلوەکانی سلێمانی و هەولێر زیاتر لە 100 تۆن خورما دەخرێتە بازاڕەوە

 

رۆژی شەممە، 25-03-2023، دانا عەزیز، ئەندامی ئەنجوومەنی عەلوەی هەولێر بە تۆڕی میدیایی رووداوی گوت: "زۆر جۆر خورما لە عەلوە هەن کە رۆژانە دەخرێنە بازاڕەوە، وەک خورمای ئێرانی، عێراقی و فەلەستینی، نرخەکانیشیان جیاوازە. خورمای عێراقی کیلۆی 1500 دینارە و لە دەرەوەی عەلوەش دووکاندار بە 2000 هەزار دەیفرۆشێت".

 

گرانترین جۆری خورما لە عەلوەی هەولێر، خورمای فەلەستینییە. ئەو ئەندامەی ئەنجوومەنی عەلوەی هەولێر دەڵێت، لە عەلوە کیلۆی 15 هەزار دینارە و بەهۆی گرانیشەوە هەموو کەسێک ناتوانێت ئەو خورمایە بکڕێت.

 

عەلوەی هەولێر رۆژانە زیاتر لە 50 تۆن خورما دەخاتە بازاڕەکانی هەولێر و دەوروبەری. بەگوتەی ئەو ئەندامەی عەلوەی هەولێر، لە رەمەزان خواست لەسەر خورما 50٪ زیاتر دەبێت، بۆیە بڕێکی زۆر خورما دێتە عەلوە و دەنێدرێتە بازاڕەکانەوە. 

 

حاجی سەروەر عەتا، سەرۆکی سەندیکای عەلوەی سلێمانی بە رووداوی گوت، ئاماری فەرمی نییە کە رۆژانە چەند تۆن خورما دەخرێتە بازاڕەوە، بەڵام بە نزیکەیی 50 تۆن دەخرێتە بازاڕەکانی سلێمانی و دەوروبەری بە پارێزگای هەڵەبجەشەوە.

 

بە گوتەی سەرۆکی سەندیکای عەلوەی سلێمانی، لە مانگەکانی دیکە نزیکەی 10 بۆ 15 تۆن خورما دەخرێتە بازاڕەکانی سلێمانی و دەوروبەری. دەشڵێت، خواست لەسەر خورما لە یەکەم تاوەکو 10ـەیەم رۆژی رەمەزانە، چونکە خەڵک کە دەکڕێت ئەو 10 رۆژەی سەرەتا دەست بە کڕینی خورما دەکەن و بەشی هەموو مانگەکەش دەکڕن. 

 

لەبارەی جۆرەکانی خورما حاجی سەروەر عەتا گوتی، سێ چوار جۆر خورمای عێراقی هەیە، لە ئێرانیش سێ چوار جۆری هەیە و خورمای فەلەستینیش هەیە، بەڵام ئەوە زۆر گرانە و هەموو کەسێک نایکڕێت، ئێستا خواست لەسەر خورمای عێراقی زیاترە. 

 

رۆژی پێنجشەممە، 23-03-2023، سۆران عەبدولغەفور، بەڕێوەبەری چاودێریی بازرگانیی سلێمانی بە تۆڕی میدیایی رووداوی گوت، لیژنەکانیان چاودێریی بازاڕ دەکەن و ناهێڵن نرخی شتوومەک بەبێ هۆکار بەرزببێتەوە، بەتایبەتی ئەو پێداویستییانەی لە رەمەزان زۆر بەکاردەهێنرێت، وەکو شیرینی و خورما. 

 

لەبارەی نرخی خورما لە بازاڕەکانی سلێمانی سۆران عەبدولغەفوور گوتی، خورمایەکی زۆر لە عەلوە و بازاڕەکان هەیە، بۆیە نرخیان بەرزنەبووەتەوە، زۆرجار هەر پێداویستییەک ئەگەر بڕێکی کەمی لێ بخرێتە بازاڕەوە ئەوە نرخی گران دەبێت، بەڵام خورما بەشی پێویست بەنرخی دیاریکراو هەیە.