رووداو دیجیتاڵ
سەرۆکی زانکۆی کوردستان لە سنە دەڵێت، 650 خوێندکاری بیانی کە زۆربەیان خەڵکی هەرێمی کوردستانن لەو زانکۆیەدا دەخوێنن و ئاماژە بەوەش دەکات، پلانیان هەیە خوێندکار لە وڵاتی زیاترەوە وەربگرن.
حامد قادرزادە، سەرۆکی زانکۆی کوردستان لەبارەی ئاستەنگەکانی بەردەم زانکۆکە بۆ وەرگرتنی خوێندکاری زیاتر گوتی، "کۆمەڵێک کێشە و سنوورداریەتی هەن"، بەڵام دەبێت زانکۆ پلانی ستراتیژیی هەبێت و بە لەبەرچاوگرتنی دۆخەکە، پلانەکان نوێ بکرێنەوە.
پێشتر ژمارەی ئەو خوێندکارانەی لە زانکۆی کوردستان لە سنە دەیانخوێند زیاتر بوو. رەحمەت سادقی، سەرۆکی پێشووی زانکۆی کوردستان رۆژی 26.04.2022 گوتی، 800 خوێندکاری بیانی لەو زانکۆیەدا دەخوێنن و خەڵکی وڵاتانی وەک عێراق، سووریا، ئەفغانستان، ئەندۆنیزیا، نایجیریا و وڵاتانی دیکەن.
زانکۆی کوردستان ساڵی 1974 وەک ناوەندێکی فێرکاری باڵا دامەزرا و دواتر بوو بە بەشێک لە زانکۆی رازی کرماشان، بەڵام ساڵی 1991 وەزارەتی خوێندنی باڵای ئێران وەک زانکۆیەکی سەربەخۆ بە فەرمی ناساندی.
کۆمێنتەکان
وەک میوان کۆمێنتێك بنووسە یان وەرە ژوورەوە و هه‌موو خزمەتگوزارییەکان به‌كاربێنه
کۆمێنتێک دابنێ