لە سەرگەڕان داعش هێرشیکردە سەر سوپای عێراق

 

رۆژی شەممە 24ى کانوونى یەکەمى 2022، غازى فەیسەڵ، فەرماندەى هێزى خۆبەخشى سنوورى چیاى قەرەچووخ بە تۆڕى میدیایی رووداوى راگەیاند، داعش لە کاژێر 06:15ی خولەکی ئێوارەوە هێرشی کردووەتە سەر لیواى 51ى فیرقەى 14ى سوپاى عێراق لە رۆژهەڵاتی چیای قەرەچووخ لە سنووری ناحیەی سەرگەڕان و تائێستا "رووبەڕووبوونەوەی تووند" لە نێوانیان بەردەوامە. 

 

غازى فەیسەڵ گوتیشی، تائێستا نازانرێت زیانەکان چین، چونکە رووبەڕووبوونەوە بەردەوامە. 

 

بە گوتەی غازى فەیسەڵ: "دوێنێ شەویش داعش هەوڵیدا هێرشبکاتە سەر هەمان سنوور، بەڵام سوپای عێراق لە رێگەی کامێرای چاودێرییەوە ئاشکرایان کردوون و تەقەیان کردووە و دووریانخستوونەتەوە." 

 

ئەمە یەکەمجار نییە داعش هێرش دەکاتە سەر ئەو سنوورە. رۆژی 21ى کانوونى یەکەمى 2022، غازى فەیسەڵ، فەرماندەى هێزى خۆبەخشى سنوورى چیاى قەرەچووخ بە رووداوى راگەیاند: "لە رۆژهەڵاتى چیاى قەرەچووخ چەند بۆمبێک بە هەمەرێکى لیواى 51ى فیرقەى 14ى سوپاى عێراقدا تەقیوونەتەوە، بەدوایدا رووبەڕووبوونەوە لەنێوان سوپا و چەکدارانى داعش روویداوە."