موەلیدە ئەهلییەكانی سلێمانی: ئەگەر گازمان بەنرخی پاڵپشتیکراو بدەنێ نیوەی نرخی ئێستا پارە وەردەگرین
رووداو دیجیتاڵ
سەرۆكی كۆمەڵەی موەلیدە ئەهلییەكانی سلێمانی رایگەیاند، ئەگەر حكومەتی هەرێمی كوردستان گازیان بە نرخی پاڵپشتی بداتێ، نیوەی نرخی ئێستا پارە لە خەڵكی وەردەگرن. دەشڵێت، لە سبەی یەكشەممەوە گۆڕانكاری لە پێدانی كارەبا دەكەن و بەیانیان كارەبای موەلیدە نابێت.
تاریق سەمین، سەرۆكی كۆمەڵەی موەلیدە ئەهلییەكانی سلێمانی بە تۆڕی میدیایی رووداوی راگەیاند، چەندیین جار داوایانكردوە وەک هێڵی پاسەكان سووتەمەنیان بە نرخی پاڵپشتیکراو بدەنێ، بەڵام وەڵامیان نەدراوەتەوە.
ئێستا خاوەن موەلیدە ئەهلییەكانی سلێمانی یەك لیتر گاز بە 1000 دینار دەكڕن، تاریق سەمین دەڵێت: ئەگەر پاڵپشتیمان بكەن و حكومەت بە 500 دینار گازمان بداتێ، ئێمەش ئەو كاتە نیوەی نرخی ئێستا وەردەگرین. پێویستە حكومەت ئەوە بۆ ئێمە و خەڵک بكات، جگە لەوە ئێمە وەك موەلیدە ئەهلییەكانی سلێمانی كارەبای مزگەوت و دامودەزگا حكومییەكان بەبێ بەرامبەر دەدەین.
سەرۆكی كۆمەڵەی موەلیدە ئەهلییەكانی سلێمانی باسی لەوەش كرد: لەسەر داوای بەڕێوەبەرایەتیی گشتیی كارەبای سلێمانی لە رۆژی یەكشەممە 25-12-2022ـەوە، گۆڕانكاری لە پێدانی كارەبا دەكەن و تاوەكو تەواوبوونی پشووەكان، بەیانیان كارەبا نادەین و لە كاژێر 11:00 پێشنیوەڕۆ تاوەكو كاژێر 01:00ی بەرەبەیان، هەر كاتێك كارەبای نیشتیمانی نەبوو كارەبای موەلیدە دەبێت.
لە شاری سلێمانی 545 موەلیدەی ئەهلی هەن، ئەم مانگە تائێستا لە شەو و رۆژێکدا نزیكەی 10 كاژێر كارەبایان داوە، قازانجی موەلیدە ئەهلییەكان بەپێی ئەوەی بەڕێوەبەرایەتیی گشتیی كارەبای سلێمانی بۆیانی دیاریكردووە، بۆ هەر ئەمپێرێك لە کاژێرێکدا 5 دینارە.