لە دوو رووداوی هاتووچۆدا لە رۆژهەڵاتی کوردستان چوار کەس گیانیان لەدەستدا
رووداو دیجیتاڵ
لە دوو رووداوی هاتووچۆدا لە پارێزگای ورمێی رۆژهەڵاتی کوردستان، چوار کەس گیانیان لەدەستدا و حەوت کەسیش بریندار بوون.
ئەمشەو لەسەر رێگەی مهاباد – میاندواو لە پارێزگای ورمێی رۆژهەڵاتی کوردستان بەهۆی رووداوێکی هاتووچۆ، دوو کەس گیانیان لەدەستدا و پێنج کەسیش بریندار بوون.
ئەسغەر فیرووزنیا، بەڕێوەبەری نەخۆشخانەی فریاکەوتنی میاندواو بە میدیاکانی راگەیاند، بەهۆی پێکدادانی دوو ئۆتۆمبێل لە جۆرەکانی نیسان و پیجۆ دوو کەس گیانیان لەدەستدا کە یەكێکیان منداڵە.
بە گوتەی ئەسغەر فیرووزنیا، پێنج کەسی دیکە لەو رووداوەدا بریندار بوون کە ئێستا لە نەخۆشخانەن و رەوشی تەندروستییان بەرەو باشبوون دەڕوات.
هاوکات لە رێگەی نێوان ماکۆ - شووت لە پارێزگای ورمێ دوو ئۆتۆمبێل پێکیاندادا و بەهۆیەوە دوو کەس گیانیان لەدەستدا و دوو کەسیش بریندار بوون.
رەزا پەناهی مقەددەم، بەڕێوەبەری پۆلیسی رێگەوبانی پارێزگای ورمێ بە میدیاکانی راگەیاند، رووداوەکە بەهۆی پێشکەوتنی یەک لە ئۆتۆمبێلەکان بووە.
رێگەی نێوان ماکۆ – شووت بەهۆی ئەوەی رێگەیەکی بازرگانییە و رێگەکە یەک سایدە و بارهەڵگری زۆری پێدا دەڕوات، هەفتانە رووداوی هاتووچۆی تێدا تۆمار دەکرێت.