لە سۆران دەستبەسەر دوو کیلۆ تلیاک دەگیرێت

 

 

سالار موشیر، بەرپرسی بنکەی نەھێشتنی ماددە ھۆشبەرەکانی سۆران بە تۆڕی میدیایی رووداوی راگەیاند، پەڕاوی لێکۆڵینەوەی بۆ تۆمەتبارەکە کراوەتەوە و لێکۆڵینەوە لەگەڵی بەردەوامە.

 

بە گوتەی سالار موشیر، ماددە هۆشبەرەکە رەوانەی بەڕێوەبەرایەتی گشتیی نەھێشتنی ماددە ھۆشبەرەکانی ھەولێر کراوە و کەسەکەش رادەستی دادگا کراوە.

 

بەپێی ئاماری بەڕێوبەرایەتیی گشتی نەهێشتنی ماددە هۆشبەرەکان، لەماوەی هەشت مانگی یەکەمی 2019دا لە سنووری بەڕێوەبەرایەتییەکانی هەولێر، دهۆک، سۆران، ئاکرێی سەر بە بەڕێوبەرایەتیی گشتی نەهێشتنی ماددە هۆشبەرەکان، 790 تۆمەتبار لەسەر ماددە هۆشبەرەکان دەستگیرکراون و دەستیش بەسەر 112 کیلۆگرام ماددەی هۆشبەردا گیراوە، کە زۆربەی هیرۆین و کریستاڵ و تلیاک بوونە.

 

هەروەها تەنیا لە ساڵی 2018 و لە هەولێر 415 کیلۆ ماددەی هۆشبەر دەستی بەسەردا گیراوە و 941 تۆمەتباریش لەسەر ماددەی هۆشبەر دەستگیرکراون.

 

بەگوێرەی زانیارییەکانی ئۆفیسی نەتەوەیەکگرتووەکان بۆ رووبەڕووبونەوەی مادەی هۆشبەر و تاوان، لەسەر ئاستی جیهان نزیکەی 200 ملیۆن کەس بەکاربەری ماددەی هۆشبەرن.