لە سەرەتای ئەم ساڵەوە 11 کەس لە دهۆک خنکاون
رووداو دیجیتاڵ
گوتەبێژی بەرگریی شارستانیی دهۆک دەڵێت، خنکانی هاونیشتمانی و هاووڵاتیان زیادیکردووە؛ ئاماژە بەوە دەکات، لەسەرەتای ئەم ساڵەوە 11 کەس لە رووبار و چەمەکانی پارێزگاکە خنکاون.
ئەمڕۆ سێشەممە 24ی ئەیلوولی 2024، بێوار عەبدولعەزیز، گوتەبێژی بەرگریی شارستانیی پارێزگای دهۆک بە تۆڕی میدیایی رووداوی راگەیاند، " ئەم ساڵ خنکان زیادیکردووە. لە هەموو ساڵی رابردوودا تەنیا چوار خنکان تۆمارکرابوون، بەڵام لە سەرەتای ئەم ساڵەوە 11 خنکان لە پارێزگای دهۆک هەبوون."
بێوار عەبدولعەزیز گوتی، "سەرەڕای ئەوەی لە شوێنە گەشتیارییەکان رێنمایی هەڵواسراوە کە لە رێگەیانەوە داوا لە گەشتیاران دەکەین دووربکەونەوە لە مەلەکردن، بەڵام بەشێکی گەشتیاران بەو رێنماییانەوە پابەند نین."
گوتەبێژی بەرگریی شارستانیی دهۆک ئەو پەیامەی ئاراستەی هاونیشتمانی و هاووڵاتیان کرد کە "داوا لە هاووڵاتیان دەکەین دووربکەونەوە لە مەلەکردن لەوشوێنانەی زانیاریی تەواویان لەبارەیان نییە، هەروەها گرنگە لە کاتی مەلەکردن جلوبەرگی تایبەت بەکاربهێنن تاوەکو رووبەڕووی هیچ رووداوێکی نەخوازراو نەبنەوە."