بەڕێوەبەری ناحیەی زێلکان: 5 گولـلە تۆپ ئاراستەی سەربازگەیەکی تورکیا کران

 

بەڕێوەبەری ناحیەی زێلکان ئاماژەی بەوە کرد کە سێ لە گوللە تۆپەکان تەقیونەتەوە و دووانەکەی دیکەیان نەتەقیون. هاوکات "تۆپبارانەکە هیچ زیانی نەبووە."

 

چەند هاونیشتمانییەک لە سنووری ناحیەکە پەیوەندییان بە رووداوەوە کردووە و دەڵێن، ئاگر لەو شوێنە کەوتووەتەوە کە تۆپەکانی ئاراستەکراون.

بە گوتەی محەممەد ئەمین، تۆپەکان نەگەیشتوونەتە بنکە سەربازییەکە و لە ناوچەیەکی چۆڵەوانی کەوتوونەتەخوارەوە. 

لەبارەی شوێنی ئاراستەکردنی گولـلەتۆپەکان و ئەو لایەنەی ئاراستەیکردوون، بەڕێوەبەری ناحیەی زێلکان گوتی، "نازانین ئەو گولـلەتۆپانە لەلایەن کێوە ئاراستەکراون."

ئەمساڵ ئەمە سێیەم جارە هێرش دەکرێتە سەر ئەو سەربازگەیەی تورکیا کە لە ساڵی 2016ـەوە لەو ناوچەیە دانراوە. سێ مانگ لەمەوبەریش چەند گولـلەتۆپێک لەنێو گوندێکی عەرەبنشین لەو سنوورە کەوتنەخوارەوە و بەهۆیەوە چوار ئەندامی یەک خێزان گیانیان لەدەستدا. 

لە سەربازگەکەی تورکیا لە زێلکان، نزیکە 300 سەرباز و بڕێک چەک و تەقەمەنی جێگیرکراون.

 

سەربەست بابیری، بەرپرسی میحوەری رۆژهەڵاتی دیجلەی پێشمەرگە بە تۆڕی میدیایی رووداوی راگەیاند، "چوار گولـلەتۆپ لە بادووش و شەلالەت ئاراستەی سەربازگەکەی تورکیا کراون. یەکێک لە گولـلەتۆپەکانیش لە نزیک گوندی نەجمووک و تلمووس کەوتووەتەخوارەوە."

ئەو بەرپرسە ئاماژەی بەوەشکرد، گولـلەتۆپەکان "بەپێی زانیاریی ورد" لەلایەن "گرووپەکانی سەر بە حەشدی شەعبییەوە ئاراستەکراون."