رووداو دیجیتاڵ
دوای سێ رۆژ لە سووتانی پووش و پاوان لە چیای زۆزکی سنووری ئیدارەی سەربەخۆی سۆران لە پارێزگای هەولێر، ئاگرەکە کۆنترۆڵکرا. بەڕێوەبەری بەرگریی شارستانیی سۆران دەڵێت، لە ماوەی یەک هەفتەی رابردوودا 15 رووداوی ئاگرکەوتنەوەی پووش و پاوان لە سنووری ئیدارەکە تۆمارکراون.
ئەمڕۆ شەممە، 24-08-2024، کاروان میراودەلی، بەڕێوەبەری بەرگریی شارستانیی سۆران لە کۆنفرانسێکی رۆژنامەڤانیدا رایگەیاند، دوای 3 رۆژ لە هەوڵدانی بەردەوامی تیمەکانیان، ئاگرەکەی چیای زۆزک کۆنترۆڵکرا.
کاروان میراودەلی گوتی: ''نزیکەی 63 کاژێر کارمان بۆ کوژاندنەوەی ئاگرەکە کردووە و زیاتر لە 150 کارمەند لە پڕۆسەی کۆنترۆڵکردنی بەشداربوون.''
ئاگرەکە دوانیوەڕۆی رۆژی چوارشەممە، 21ـی ئاب لە چیای زۆزک کەوتەوە. بەڕێوەبەری بەرگریی شارستانیی سۆران گوتی: ''کاژێر 11:25 خولەکی شەوی رابردوو ئاگرەکە کۆنترۆڵکرا و تاوەکو بەیانیی ئەمڕۆ کاژێر 08:00 بە چڕی چاودێریی چیای زۆزکمان کرد بۆ ئەوەی لە کۆتاییهاتنی ئاگرەکە دڵنیابینەوە.''
هاوکات، رەوەند هاودیانی، گوتەبێژی بەرگریی شارستانیی ئیدارەی سەربەخۆی سۆران گوتی، لە ئاگرەکەی چیای زۆزکدا نزیکەی هەزار دۆنم زەوی و پووش و پاوان سووتاوە.
سەبارەت بە هۆکاری ئاگرکەوتنەوەکەش رەوەند هاودیانی گوتی، ''بەهۆی ئەوەی 3 رۆژ بەردەوام بوو، گومانمان لە سەرچاوەکەی هەیە، بەڵام ناتوانین کەس تۆمەتبار بکەین و هیچ کەسێکیش پەیوەست بە دۆسیەکەوە دەستگیرنەکراوە.''
چیای زۆزک بەسه‌ر شارى سۆران لە پارێزگای هەولێر دەڕوانێت و ژمارەیەک گوند دەکەونە دامێنی.
بەپێی راپۆرتێکی بەرگریی شارەستانیی سۆران کە هەر ئەمڕۆ لە کۆنفرانسە رۆژنامەڤانییەکەدا خرایەڕوو، لە 6 مانگی سەرەتای ئەم ساڵدا زیاتر لە 100 رووداوی ئاگرکەوتنەوە لە زەویوزار و پووش و پاوانی سنوورەکەدا کەوتوونەتەوە کە 15ـیان لە یەک هەفتەی رابردوودا بوون.
کۆمێنتەکان
وەک میوان کۆمێنتێك بنووسە یان وەرە ژوورەوە و هه‌موو خزمەتگوزارییەکان به‌كاربێنه
کۆمێنتێک دابنێ