رووداو دیجیتاڵ
له‌سه‌ر داوای سه‌رۆكی ئه‌نجوومه‌نی پارێزگای كه‌ركووك، بڕیاره ئەمڕۆ شه‌ممه دانیشتنی ئه‌نجوومه‌نی پارێزگای پارێزگاکە به‌رێوه‌بچێت. بەرەی تورکمانی و هاوپەیمانیی عەرەبی له کەرکووک ره‌تیده‌كه‌نه‌وه به‌شداری له كۆبوونه‌وه‌كه‌دا بكه‌ن و به نایاسایی ناوی ده‌به‌ن.
پەروین فاتیح، ئەندامی ئەنجوومەنی پارێزگای کەرکووک لە فراکسیۆنی یەکێتیی نیشتمانیی کوردستان بە تۆڕی میدیایی رووداوی راگەیاند: "بانگهێشتنامە بۆ سەرجەم ئەندامانی ئەنجوومەن نێردراوە. تاوەکو ئێستاش هیچ لایەنێک بە فەرمی ئاگاداری نەکردووینەتەوە کە بەشداری ناکات".
پەروین فاتیح گوتیشی: "کۆبوونەوەکە لە سێ بڕگە پێکدێت؛ دەنگدان لەسەر پێکهێنانى لیژنە بۆ هەموارى پەیڕەوى ناوخۆى ئەنجوومەن و تاوتوێکردنی پرسی دامەزراندنى هاووڵاتییان بە گرێبەست کە زیاتر لە 7 هەزار کەس دەبن. بڕگەى سێیەمی کۆبوونەوەکەش ئەوەیە داوا لە تورکمانەکان بکرێت بە زووترین کات پۆستەکانیان پڕبکەنەوە."
هاوکات، سەوسەن شاکر، ئەندامی تورکمان لە ئەنجوومەنی پارێزگای کەرکووک بە رووداوی گوت: "بڕیاری کۆتاییمان داوە و بەهیچ شێوەیەک بەشداری لەو کۆبوونەوەیە ناکەین".
هەر لەو بارەیەوە حەسەن مەجید، سەرۆکی فراکسیۆنی پارتی دیموکراتی کوردستان لە ئەنجوومەنی پارێزگای کەرکووک بە رووداوی راگەیاند: "هێشتا هیچ بڕیارێکی فەرمیمان سەبارەت بەو پرسە پێنەگەیشتووە و تائێستا دیار نییە بەشدار دەبین یان نا".
لای خۆیەوە پارتى سەروەرى لە کەرکووک بە راگەیێندراوێک بەشداریکردنی لە کۆبوونەوەکەی ئەنجوومەنى پارێزگا رەتکردەوە و رایانگەیاند، پۆستى پارێزگارى کەرکووک مافى پێکهاتەى عەرەبە و ئەوەش واى لێکردوون بەشداریکردن لە کۆبوونەوەى ئەنجوومەنى پارێزگا رەتبکەنەوە.
سەلوە مەفرەجی، ئەندامی ئەنجوومەنی پارێزگای کەرکووک لە پارتی سەروەری بە رووداوی راگەیاند، "هەڵوێستمان نەگۆڕە و ئەوەی لە راگەیێندراوەکەدا باسمان کردووە لێی پاشگەز نابینەوە".
رۆژی 10ـی ئاب، ئەنجوومەنى پارێزگاى کەرکووک بە ئامادەبوونى 9 ئەندام لە هۆتێل رەشید لە بەغدا کۆبووەوە و حکومەتى خۆجێیی هەڵبژارد. پۆستى پارێزگار درا بە کورد لە پشکى یەکێتى و پۆستى سەرۆکى ئەنجوومەنى پارێزگاش درا بە عەرەب.
کۆمێنتەکان
وەک میوان کۆمێنتێك بنووسە یان وەرە ژوورەوە و هه‌موو خزمەتگوزارییەکان به‌كاربێنه
کۆمێنتێک دابنێ