رووداو دیجیتاڵ
بەرپرسێکی تەندروستیی شاری میهران لە پارێزگای ئیلام دەڵێت، 22 کەس بەهۆی گەرماوە نەخۆش کەوتوون و رەوانەی نەخۆشخانەی سەرەکیی ئەو شارە کراون. بەپێی راپۆرتی کەشناسی، دوێنێ پلەی گەرما لە شاری میهران 51 پلەی سیلیزی بووە.
ئیحسان عەباسی، بەڕێوەبەری نەخۆشخانەی ئیمام حوسێنی شاری میهران رایگەیاند: "رۆژی یەکشەممە 22 کەس بەهۆی کاریگەرییەکانی بەرزبوونەوەی پلەی گەرماوە سەردانی نەخۆشخانەکەیان کردووە."
ئیحسان عەباسی گوتی، ئەو کەسانە چارەسەری پێویستیان بۆ کرا و دوای باشبوونی دۆخی تەندروستیان، رەوانەی ماڵەوە کرانەوە.
بەڕێوەبەری نەخۆشخانەی ئیمام حوسێنی شاری میهران گوتیشی: "بە لەبەرچاوگرتنی پێشبینییەکان بۆ بەرزبوونەوەی پلەی گەرما لە رۆژانی داهاتوودا، ئامۆژگاری هاووڵاتییان دەکەین کە لە کاژێرە گەرمەکانی رۆژدا خۆیان لە چوونە دەرەوەی ناپێویست بەدوور بگرن و لە ئەگەری دەرکەوتنی نیشانەکانی لاوازی و بێهێزیش لە جەستەیاندا سەردانی نەخۆشخانە و بنکە تەندروستییەکان بکەن."
کەشناسیی پارێزگای ئیلام دەڵێت، ئەو شەپۆلە گەرمایەی لە هەفتەی رابردووەوە پارێزگاکەی گرتووەتەوە، لە رۆژانی داهاتووشدا بەردەوام دەبێت و ئەگەری بەرزبوونەوەی زیاتری پلەی گەرمایش هەیە.
کۆمێنتەکان
وەک میوان کۆمێنتێك بنووسە یان وەرە ژوورەوە و هه‌موو خزمەتگوزارییەکان به‌كاربێنه
کۆمێنتێک دابنێ