هۆرڤان رەفعەت پەیامنێری رووداو لە سلێمانی لەبارەی بەڕێوەچوونی نوێژی جەژن لەو شارە گوتی: "لەسەرجەم مزگەوتەکانی سلێمانی کە زیاتر لە 200 مزگەوتە نوێژی جەژن کرا، بەهەمانشێوە لە شارۆچکە و گوندەکان و ئیدارەکانی گەرمیان و راپەڕینیش نوێژی جەژن کرا".

 

هۆرڤان رەفعەت ئاماژەی بە جیاوازییەکانی یەکەم رۆژی جەژن لە سلێمانی بەراورد بە ساڵانی رابردوو کرد و گوتی: "ئەگەرچی نوێژکرا بەڵام قەرەباڵخیی وەک ساڵانی رابردوو نەبوو. شەقامەکانیش بەهۆی قەدەخەی هاتووچۆوە چۆڵن و لە کاژێر 07:00 ـەوە هیزە ئەمنییەکان دەچنە سەر شەقامەکان بۆ جێبەجێکردنی بڕیاری قەدەخەی هاتووچۆ".

 

یەکێک لەو مزگەوتانەی هەولێر کە دەرگای کراوەبوو مزگەوتی بەختیاری بوو. پ.د.عوسمان هەڵەبجەیی، مامۆستای زانکۆ و گوتاربێژی مزگەوتی بەختیاری لە گوتاری نوێژی جەژن، گوتارەکەی لەبارەی لێبوردەیی بوو و گوتی: "مانگی رەمەزان فێری کردین لێبوردەبین، فێری کردین عەیب و عاری خەڵک داپۆشین، ئەگەر لەگەڵ بەندەکانی خودا لێبوردە نەبی ئەوە خودای گەورە لێت نابوورێ. ئەگەر داوای داپۆشینی عەیب و عارت دەکەی دەبێ عەیب و عاری خەڵک داپۆشی بۆ ئەوە خوا وەڵامی ئەو داوایەت بداتەوە".

 

یوسف موسا لە مزگەوتێکی زاخۆ کە تێیدا نوێژی جەژن دەکرا زانیاری لەبارەی دۆخی شارەکە خستەڕوو و گوتی: "جەژنی ئەمساڵ بەراورد بە ساڵانی رابردوو جیاوازییەکی زۆری هەبوو، ئەو قەرەباڵخییەی ساڵانی رابردوو لە مزگەوت و گەڕەک و شەقامەکان دەبیندرا ئەمساڵ نەبوو. دەرگای زۆربەی مزگەوتەکان کراوەبوون، پۆلیس و ئاسایش لە بەر دەرگای مزگەوتەکان بوون و رێنماییان بە خەڵک دەدا".

هەڵۆ محەممەد، پەیامنێری رووداو لە یەکێک لە گەڕەکەکانی ئەو شارە کە تێیدا نوێژی جەژن دەکرا ئامادەبوو و لەوبارەوە گوتی: "بەدرێژایی مانگی رەمەزان نوێژی تەروایح لەم گەڕەکە کە ناوی دریم لاندە لە باخچەیەکی گەڕەکەکە دەکرا بە پاراستنی رێنمانییە تەندروستییەکان، بەهەمانشێوە نوێژی جەژنیش هەر لەو شوێنە کرا".

ئەمرۆ یەکشەممە یەکەم رۆژی جەژنی رەمەزانە. سەرەڕای قەدەخەی هاتووچۆ بەڵام لە زۆربەی مزگەوتەکانی شار و شارۆچکەکانی هەرێمی کوردستان هاونیشتمانیان بە کۆمەڵ نوێژی جەژنیان ئەنجامدا، لەو شوێنانەش کە مزگەوتەکان داخرابوون لە گەڕەکەکان کۆبوونەوە و نوێژی بەکۆمەڵیان کرد. 

تۆڕی میدیایی رووداو لە کاژێر 05:00 بەیانییەوە دەستی بە رووماڵکرد و دوایین زانیاری و پێشهاتەکانی شار و شارۆچکەکانی باشووری کوردستان، رۆژئاوا و باکووری کوردستان لەرێگەی پەیامنێرەکانەوە دەگوازێتەوە.