لە سنە ژمارەیەکی دیکە لە قوتابییانی کچ ژەهراوی بوون و گواسترانەوە بۆ نەخۆشخانە

 

 

ئەمڕۆ دووشەممە 24-04-2023 قوتابییانی قوتابخانەکانی میعراج و عیسمەت کە قوتابخانەی ناوەندی و دواناوەندیی کچانەن لە گەڕەکی حەسەنئاوای سنە ژەهراوی بوون.

 

تائێستا بەڕێوەبەرایەتیی پەروەردەی سنە هیچی لەبارەی ژەهراویبوونی ئەو قوتابییانە بڵاونەکردووەتەوە، بەڵام بەپێی ئەو ڤیدیۆیانەی کەسوکاری قوتابییان بڵاویان کردوونەتەوە، تەندروستیی ژمارەیەک قوتابی بەهۆی ژەهراویبوونەوە تێکچووە و رەوانەی نەخۆشخانە کراون.

 

نزیکەی پێنج مانگە ژەهراویبوونی قوتابییان، بەتایبەت قوتابییانی کچ، لە قوتابخانەکانی ئێران و رۆژهەڵاتی کوردستان دەستیپێکردووە. وەزیری تەندروستیی ئێران رایگەیاندووە، بەپێی لێکۆڵینەوەکان نیشانەی ژەهراویبوون لە پشکنینی 90%ی ئەو قوتابییانەدا دەرنەکەوتووە.

 

رێکخراوی لێبووردنی نێودەوڵەتی هەفتەی رابردوو لە راپۆرتێکدا رایگەیاند، بەپێی ئەو زانیارییانەی لە نێوخۆی ئێران پێی گەیشتووە، وەزارەتی تەندروستیی ئێران بڕیاری داوە پزیشکەکان نابێت لە راپۆرتی تێکچوونی تەندروستیی قوتابییاندا ئاماژە بە ژەهراویبوونیان بکەن.