رووداو دیجیتاڵ
بەڕێوەبەرایەتیی گشتیی بەکارخستنی فڕۆکەخانەکانی دەوڵەت سەر بە وەزارەتی گواستنەوە و ژێرخانی تورکیا، ئاماری مانگی کانوونی دووەمی 2024ی فڕۆکەخانەی عەزیز سانجاری لە مێردینی باکووری کوردستان بڵاوکردەوە.
لەو مانگەدا 65 ھەزار و 688 کەس لە رێگەی ئەو فڕۆکەخانەیەوە گەشتیان کردووە و 578 تۆن باری کارگۆش هەر لەو رێگەیەوە گوێزراوەتەوە.
هەر لە کانوونی دووەمدا، 14 ملیۆن و 739 ھەزار و 696 کەس لە رێگەی فڕۆکەخانەکانی باکووری کوردستان و تورکیاوە گەشتیان کردووە؛ 337 هەزار و 443 تۆن باری کارگۆش لە رێگەی فڕۆکەخانەکانەوە گوێزراوەتەوە.
بەگوێرەی ئاماری ئەو بەڕێوەبەرایەتییە، لە 2023دا 214 ملیۆن و 232 هەزار و 985 کەس لە رێگەی 2 ملیۆن و 167 هەزار و 19 فڕۆکەوە لە سەرجەم فڕۆکەخانەکانی تورکیا و باکووری کوردستانەوە گەشتیان کردووە؛ هەروەها 4 ملیۆن و 211 هەزار و 919 تۆن کەلوپەل لەو فڕۆکەخانانەوە گوێزراوەتەوە.
فڕۆکەخانەی مێردین لە ساڵی 1999 دامەزرا، 75 کم لە ناوەندی شاری مێردینەوە دوورە؛ ساڵی 2011 نۆژەنکرایەوە و ساڵی 2014 فراوان کرا؛ ساڵی 2023 فڕۆکەخانەکە ناوی بۆ فڕۆکەخانەی پرۆفیسۆر دکتۆر عەزیز سانجار گۆڕدرا. دکتۆر عەزیز زانایەکی بەناوبانگی بواری کیمیایە و ساڵی 2015 خەڵاتی نۆبڵی وەرگرت.
لە سەرانسەری تورکیادا 62 فڕۆکەخانەی سڤیل هەن کە 18یان لە باکووری کوردستاندان؛ هەریەک لە فڕۆکەخانەکانی ئامەد، خارپێت، ئەرزەڕۆم، دیلۆک، قەرس، مەلەتێ، سێواس، رووها و وان، نێودەوڵەتین.
کۆمێنتەکان
وەک میوان کۆمێنتێك بنووسە یان وەرە ژوورەوە و هه‌موو خزمەتگوزارییەکان به‌كاربێنه
کۆمێنتێک دابنێ