رووداو دیجیتاڵ
بەشی پێشبینییەکانی کەشوهەوا لە وەزارەتی گواستنەوەی هەرێمی کوردستان دەڵێت، سەرەتای هەفتەی داهاتوو شەپۆلێکی بارانبارین هەرێمی کوردستان دەگرێتەوە و تاوەکو رۆژی چوارشەممە بەردەوام دەبێت.
ئەمڕۆ سێشەممە، 24-01-2023، بەشی پێشبینییەکانی کەشوهەوا لە وەزارەتی گواستنەوەی هەرێمی کوردستان لەبارەی دەستپێکردنەوەی وادەی بارانبارین لە هەرێمی کوردستان راگەیێندراێکی بڵاوکردەوە و دەڵێت، "رۆژى شەممە رێکەوتى، 28-1-2023، شەپۆلێکى بارانبارین روو لە ناوچەکەمان دەکات تاوەکو رۆژى چوارشەممە بەردەوام دەبێت."
بەگوێرەی ئەو راگەیێندراوە، شەپۆلی بارانبارینەکە سەرەتا کاریگەریی لە ناوچە شاخاوییەکان دەبێت بە نمەباران و بەفربارین. دەشڵێت، رۆژی یەکشەممە، 29-01-2023، کاریگەریی ئەو شەپۆلە بە لاوازی دەمێنێتەوە، بەڵام دووشەممە و سێشەممەی هەمان هەفتە کاریگەریی ئەو شەپۆلە بەهێز دەبێتەوە و باران لە تەواوی هەرێمی کوردستان دەبارێت.
لەبارەی بەفربارین، بەشی پێشبینییەکانی کەشوهەوا لە وەزارەتی گواستنەوەی هەرێمی کوردستان دەڵێت، لە رۆژانی دووشەممە و سێشەممە بەفر لە ناوچە شاخاوییەکان دەبارێت.
بەگوێرەی ئەو راگەیێندراوە، بەهۆی ئەو شەپۆلی باران و بەفر بارینەی کە هەرێمی کوردستان دەگرێتەوە، پلەى گەرما نزم دەبێتەوە و ئاستى دابارینیش مامناوەند دەبێت و، رۆژى چوارشەممە کۆتایی بە کاریگەریى ئەو شەپۆلە دێت.
هەر ئەمڕۆ بەشی پێشبینییەکانی کەشوهەوا لە وەزارەتی گواستنەوە کەشی پێشبینیکراوی ئەمڕۆ و سبەی بەمشێوەیە خستەڕوو:
بەرزترین پلەی گەرما بەمشێوەیە دەبێت:
- هەولێر: 15 پلەى سیلیزى
- سلێمانی: 11 پلەى سیلیزى
- دهۆک: 13 پلەى سیلیزى
- کەرکووک: 17 پلەى سیلیزى
- هەڵەبجە: 12 پلەى سیلیزى
- زاخۆ: 15 پلەى سیلیزى
- سۆران: 11 پلەى سیلیزى
- گەرمیان: 18 پلەى سیلیزى
کۆمێنتەکان
وەک میوان کۆمێنتێك بنووسە یان وەرە ژوورەوە و هه‌موو خزمەتگوزارییەکان به‌كاربێنه
کۆمێنتێک دابنێ