وەزیری بەرگریی هۆڵەندا سەردانی هەولێر دەکات

 

 

سەرچاوەیەکی ئاگادار لە وەزارەتی پێشمەرگە ئەمڕۆ دووشەممە 23-12-2024 بە تۆڕی میدیایی رووداوی گوت: "روبن بریکلمانس، وەزیری بەرگریی ھۆڵەندا کەمێکی دیکە دەگاتە فڕۆکەخانەی نێودەوڵەتیی هەولێر و لە لایەن شۆڕش ئیسماعیل، وەزیری پێشمەرگەوە پێشوازی لێ دەکرێت".

 

بڕیارە هەر ئەمڕۆ روبن بریکلمانس لەگەڵ نێچیرڤان بارزانی، سەرۆکی هەرێمی کوردستان کۆببێتەوە.

 

بەگوێرەی وەزارەتی پێشمەرگە، لە کۆبوونەوەی روبن بریکلمانس و نێچیرڤان بارزانیدا، چاکسازییەکانی وەزارەتی پێشمەرگە و بەردەوامیی هاوکارییەکانی هۆڵەندا بۆ پێشمەرگە تاوتوێ دەکرێت.

 

روبن بریکلمانس لەم سەردانەیدا بۆ هەرێمی کوردستان، سەربازان و راوێژکارەکانی وڵاتەکەی بەسەر دەکاتەوە.

 

هۆڵەندا لە کاتی شەڕی دژی داعشەوە، لە چوارچێوەی هاوپەیمانیی نێودەوڵەتیدا لە هەرێمی کوردستان هەن و هاوکاری هێزەکانی پێشمەرگە دەکەن.

 

شەممەی رابردوو، گویدۆ کرۆسێتۆ، وەزیری بەرگریی ئیتاڵیا سەردانی هەرێمی کوردستانی کرد و رۆژی یەکشەممە لەگەڵ سەرۆکی هەرێمی کورستاندا کۆبووەوە.