تەرمی گەنجێک لەنێو پارکێکی دەڕەشار لە رۆژهەڵاتی کوردستان دۆزرایەوە

 

رۆژی شەممە، 23ـی کانوونی یەکەمی 2023، بەڕێوەبەرایەتیی پۆلیسی دەڕەشاری پارێزگای ئیلام دۆزینەوەی تەرمی گەنجێکی لەنێو پارکی سەراوی ئەو شارە راگەیاند.

 

ئەو بەڕێوەبەرایەتییە لە راگەیێنراوێکدا ئاماژەیداوە، "لەلایەن هاووڵاتییانەوە ئاگادار کراینەوە تەرمێک لەنێو حەوزی ئاوی پارکی سەراودا کەوتووە، دوای دەرهێنانی تەرمەکە بۆمان دەرکەوت کوڕێکی گەنجە، بەڵام هۆکاری گیانلەدەستدانەکەی نەزانراوە".

 

بەگوێرەی راگەیێنراوەکە، دوای لێکۆڵینەوەی پۆلیس توانیویانە ناسنامەی گەنجەکە ئاشکرا بکەن و دوای ئاگادارکردنەوەی بنەماڵەکەی دەرکەوتووە خەڵکی دەڕەشارە و تەمەنی 23 ساڵانە".

 

پۆلیسی دەڕەشار لە نزیک تەرمەکە مۆبایلی ئەو گەنجەی دۆزیوەتەوە و لێکۆڵینەوەی لەبارەی هۆکاری گیانلەدەستدانەکە دەستپێکردووە.

 

دەڕەشار لە باشووری رۆژهەڵاتی پارێزگای ئیلامی رۆژهەڵاتی کوردستان هەڵکەوتووە و بەپێی دوایین سەرژمێری ساڵی 2016ـی ناوەندی ئاماری ئێران، ژمارەی دانیشتووانی 22 هەزار کەسە.