سیاسەتڤان و لێکۆڵەرێک: کەرکووک نەبووەتە کاری لەپێشینەی سەرکردایەتیی کورد

 

 

دەنگی کورد بەراورد بە هەردوو پێکهاتەکە نزیکەی 40 هەزار کەمترە؛ کوردانی کەرکووک بەشدارییان لە هەڵبژاردن کردووە و دەڵێن، "ئەوەی بەدەستهاتووە، کەم نییە گەر لایەنەکان کۆدەنگ بکات."

 

خالید قادر ئەسعەد، خەڵکی گوندی قوتان دەڵێت، "کورد دەیتوانی لەوە زیاتریش بهێنێت، ئەوەندەی هێناوە هەر باشە، گرنگ دەمێنێتەوە لای سیاسییەکانمان، مافی کورد نەڕوات."

 

شەماڵ عاسی، دانیشتووی رەحیماوا ئاماژە بەوە دەکات، "ئەوەی نەهاتووە بۆ دەنگدان، خۆی زەرەرمەندە، چەندین شەهیدمان دا، چی دیلەکانی حەویجەمان، چی ئەم چوار شەهیدەی ئەم دواییەمان، داواشم لە سەرکردایەتییە برایەتی بسەلمێنێت."

 

بەشداریی عەرەب لەم هەڵبژاردنە بە رێژەیی لەنێوان 70% بۆ ‎%‎75 بوو، تورکمان و کوردیش هاوشێوەی یەکدی بە رێژەی 60%، بەشدارییان کەمتر بووە لە عەرەب.

 

شکۆ عومەر شانۆکارە و یەکێکە لەو کەسانەی بۆ یەکەمجارە بایکۆتی هەڵبژاردنی کردووە، بۆ ئەوەش هۆکاری خۆی هەیە و دەڵێت، "بێ ئومێدبوونی تاکی ئەم شارە لە سەرکردەی سیاسیی ئەم شارە، کە ماوەی 20 ساڵە بڕیاردەرن، دووەم بەڕاستی دیدگایەکی روون نەبوو لەلایەن سەرکردایەتیی سیاسیی کوردەوە."

 

هۆکارێکی دیکە کەمیی بەشداریکردنی کوردە لە دەنگدان، بەشێکی خەڵک بۆ کێشەی پەنجەمۆر دەیگەڕێننەوە و بڕوایان وایە پیلانگێڕیی سیاسی بووە دژی کورد.

 

دڵشاد رەحمان، دووکاندار دوو کەس لە خێزانەکەی بەو هۆیەوە بێبەش کران و دەڵێت، "گەنج بووین و رۆیشتین، گوتی نایخوێنێتەوە، بە هەر دە پەنجەکەی دایدەنا، ئامێرەکە نەیدەخوێندەوە."

 

ئەحمەد عەزیز سیاسەتڤان و لێکۆڵەرە، دەربارەی پرسی ناوچە دابڕاوەکان بڕوای وایە رێژەی دانیشتووانی کورد زیاترە لە 50%، بەڵام کەمیی بەشداری بەندە لەسەر چەندین هۆکار، لە سەرووی هەموویانەوە ناکۆکیی تووندی سیاسییەکان، بەتایبەتی پارتی و یەکێتی.

 

ئەو سیاسەتڤان و لێکۆڵەرە دەربارەی پرسی ناوچە دابڕاوەکان ئەوەی خستەڕوو، "کورد کەرکووکی نەکردووەتە لەپێشینە، کەرکووکی نەکردووەتە پرسێکی بنەڕەتیی خۆی، بەپێی قورساییەکەی نەهاتووەتە نێو پرسەکەوە، لەنێو نوێنەرایەتیی کوردیش لە بەغدا. هۆکارێکی دیکەش، دەتوانین بڵێین ئەوەیە، کورد دەرپەڕێندراوە لەڕووی دەسەڵاتەوە و لەڕووی سەربازییەوە هیچ بوونێکی نییە."

 

بەپێی دەنگی لایەنەکان، کە یەکلایی بووەتەوە، کورد خاوەنی حەوت کورسی، عەرەب شەش کورسی، تورکمان دوو کورسی و مەسیحی یەک کورسی دەبن لە ئەنجوومەنی داهاتووی پارێزگای کەرکووک.