رووداو دیجیتاڵ
پێشبینی دەکرێت شەپۆلێکی بارانبارین باشووری کوردستان بگرێتەوە. ئەگەری خۆڵبارینیش لە پارێزگاکانی نەینەوا و ئەنباری عێراق هەیە.
ئەمڕۆ شەممە 23ى تشرینى دووەمى 2024 عامر جابری، بەڕێوەبەری راگەیاندن و پەیوەندییەکانی دەستەی کەشناسی و بوومەلەرزەزانیی عێراق، بە تۆڕى میدیایی رووداوى راگەیاند، باشووری کوردستان و بەشێکی عێراق دەکەوێتە ژێر کاریگەریی نزمە پاڵەپەستۆیەک کە لە دەریای نێوەڕاستەوە هەڵدەکات.
عامر جابری گوتی، پێشبینی دەکرێت لە سبەی یەکشەممەوە لە باشووری کوردستان و بەشێکی عێراق باران ببارێت و ئەو کەشەش تاوەکو ئێوارەی دووشەممە یان بەرەبەیانی سێشەممە بەردەوام دەبێت.
عامر جابری باس لەوە دەکات، لێزمە باران لە بەشی زۆری باشووری کوردستان دەبارێت کە هەورەبرووسکەی لەگەڵ دەبێت؛ بەفریش لە ناوچە شاخاوییەکان دەبارێت و ئەگەری دروستبوونی لافاویش لە هەندێک ناوچە هەیە.
بەڕێوەبەری راگەیاندن و پەیوەندییەکانی دەستەی کەشناسی و بوومەلەرزەزانیی عێراق باسی ئەوەی کرد، بارانبارینەکە پارێزگاکانی دیالە و واستیش لە عێراق دەگرێتەوە و ئەگەری هەیە لە واست لافاو دروست بێت.
عامر جابری دەڵێت، پێشبینی دەکرێت لە سبەی یەکشەممەوە خێرایی با سنووری ئەنبار و نەینەوا بگاتە 50- 60 کیلۆمەتر لە کاژێرێکدا ئەوەش خۆڵبارین لەگەڵ خۆی بێنێت و مەودای بینین بۆ کەمتر لە یەک کیلۆمەتر کەم بکاتەوە.
کۆمێنتەکان
وەک میوان کۆمێنتێك بنووسە یان وەرە ژوورەوە و هه‌موو خزمەتگوزارییەکان به‌كاربێنه
کۆمێنتێک دابنێ