رووداو دیجیتاڵ
لە مەلەتیی باکووری کوردستان دوو بوومەلەرزە روویاندا، پارێزگاریش هۆشداری بە هاونیشتمانییان دەدات لە باڵەخانە کۆنەکان دووربکەونەوە.
کاژێر 17:46ی ئەمڕۆ پێنجشەممە، 23ـی تشرینی دووەمی 2023، بوومەلەرزەیەک بە گوڕی 5.2 پلەی رێختەر لە شارۆچکەی بەتاڵگازی لە مەلەتی روویدا. دوای سێ خولەکی دیکە، بوومەلەرزەی دووەم بە گوڕی 4.7 پلە روویدا.
هاونیشتمانییان لە ترسی ئەگەری روودانی بوومەلەرزەی دیکە، ماڵەکانیان چۆڵکرد و لە شەقام و پارکەکاندا ماونەتەوە.
ئەرسین یازیجی، پارێزگاری مەلەتی داوای لە هاونیشتمانییان کرد لە باڵەخانە کۆنەکان و ئەو باڵەخانانەی تازە دروستکراوەکان، دوور بکەونەوە و لە ئەگەری هەر رووداوێکی نەخوازراودا، پەیوەندیی بە هێڵی گەرمی دەزگای ئافاد بکەن.
لەلایەکی دیکەشەوە، عەلی یەرلیکایا، وەزیری ناوخۆی تورکیا لە هەژماری تایبەتی خۆی لە تویتەر بڵاویکردەوە، تیمەکانی دەزگای ئافاد و دامەزراوە فەرمییەکانی دیکەی سەر بە وەزارەتەکەمان لەناو پارێزگاکەدا بڵاوبوونەتەوە و سەرقاڵی کۆکردنەوەی زانیارین لەبارەی زیانەکان. بەو هیوایەی زیانی گیانی رووینەدابێت.
بەگوێرەی زانیارییەکانی ئافاد، هەردوو بوومەلەرزەکە بە قووڵایی 6.99 و 7.02 کم تۆمارکرا. بوومەلەرزەی یەکەم لە سەمسوور هەستی پێکرا.
دەزگای ئافاد راشیگەیاند، لە دوای هەردوو بوومەلەرزە بەهێزەکەی رۆژی 6ی شوبات تاوەکو ئێستا 38 هەزار و 118 پاشلەرزە روویانداوە، کە 12 پاشلەرزە 6 پلە و 73یان 5 پلە بووە.
کاژێر 04:17 خولەکی بەرەبەیانی رۆژی 6ی شوباتی 2023، بوومەلەرزەیەک بەگوڕی 7.7 پلەی رێختەر، کە چەقەکەی مەرەشی باکووری کوردستان بوو، 11 پارێزگای تورکیا و باکووری کوردستانی هەژاند. بەگوێرەی ئامارە فەرمییەکان، 50 هەزار و 783 کەس لە باکووری کوردستان و تورکیا گیانیان لەدەستداوە و زیاتر لە 107 هەزار 204 کەس برینداربوون.
کۆمێنتەکان
وەک میوان کۆمێنتێك بنووسە یان وەرە ژوورەوە و هه‌موو خزمەتگوزارییەکان به‌كاربێنه
کۆمێنتێک دابنێ