کۆڕەک تیلیکۆم: پێشوازیی لە بڕیاری داشکاندنی نرخی کارتی مۆبایل دەکەین

 

ئەنجوومەنی وەزیرانی عێراق لە کۆبوونەوەی رۆژی 22-11-2022یدا بڕیاری دا، نرخی کارتێکی پێنج هەزاری لە شەش هەزار و 250 دینارەوە ببێتە پێنج هەزار و کارتی 10 هەزاریش لە 12 هەزار و 500 دینارەوە ببێتە 10 هەزار دینار.

 

ئەمڕۆ چوارشەممە 23-11-2022 چاوشین حەسەن، بەڕێوەبەری رێپێدراوی کۆمپانیای کۆڕەک تیلیکۆم بە تۆڕی میدیایی رووداوی راگەیاند، کۆمپانیای کۆڕەک تیلیکۆم، پێشوازیی لەو بڕیارەی حکومەتی عێراق دەکات و، وەکو خۆی و لەکاتی خۆی جێبەجێی دەکات.

 

دوای بڕیارەکەی ئەنجوومەنی وەزیرانی عێراق، هیام یاسری، وەزیری گەیاندنی عێراق راگەیێندراوێکی بڵاوکردەوە و ئاماژەی بەوە کرد، سوپاس و پێزانین بۆ محەممەد شیاع سوودانی، سەرۆکوەزیرانی عێراق کە پشتیوانیی گەورە بوو لە دابەزینی نرخی کارتی مۆبایل و ئینتەرنێت. گوتیشی: "سوپاس بۆ وەزیرانەکان کە دەنگیان بۆ ئەو بڕیارە داوە لەگەڵ ئەندامانی پەرلەمانی عێراق لە سەرووی هەموویانەوە محەممەد عەلی ئەکبەر مەندەلاوی، جێگری سەرۆکی پەرلەمان و سەرۆکی فراکسیۆنەکان، کە سەرجەمیان پشتیوانی ئەو بڕیارە بوون."

 

چاوشین حەسەن گوتی: ئەم بڕیارە، لە خزمەتی هاووڵاتییاندایە، هەر بڕیارێکیش خزمەتی هاووڵاتی بکات، پێشوازیی لێدەکەین و گوتیشی: "هەرچەندە کاتێکی کەممان لە بەردەمە بۆ جێبەجێکردنی بڕیارەکە، بەڵام هەموو هەوڵێک دەدەین لەکاتی خۆیدا جێبەجێ بکەین".

 

بەڕێوەبەری رێپێدراوی کۆمپانیای کۆڕەک تیلیکۆم سوپاسی سەرۆکوەزیرانی عێراق و وەزیری گەیاندن کرد کە رۆڵیان هەبووە لەم بڕیارە و ئاماژەی بەوە کرد، لە جێبەجێکردنی بڕیارەکەدا، "ئێمە کارتی پێنج هەزاری، بە پێنج هەزار کەمتر دەدەینە بریکارەکانمان و دەبێ ئەوان بە 5000 دینار بیفرۆشن."

 

وەزیری گەیاندنی عێراق دەڵێت، لە 1-12-2022وەوە کار بە بڕیاری کەمکردنەوەکە دەکەن. 

  

لە ساڵی 2015ـەوە بەپێی یاسای بودجە، بە رێژەی 20% باجی سەر کارتی مۆبایل و ئینتەرنێت لە عێراق زیادکرا و لە یاسای بوودجەدا جێگیر کرا.

  

وەزیری گەیاندنی عێراق دەڵێت، لە بنەڕەتدا پێویست بوو زیادکردنی ئەو 20%ـەی باجی سەر کارتی مۆبایل کۆمپانیاکان بیدەن، نەک خەڵکی هەژار. دەشڵێت، "بەڵام ئەوکات هاووڵاتییان هەڵوێستێکی شەرەفمەندانەیان هەبوو کە لەپاڵ دەوڵەت وەستانەوە و لە گیرفانی خۆیان ئەو باجەیان دا، بۆیە ئێستا پێویستە وەڵامێکی جوانی هاووڵاتییان بدەینەوە."

 

رۆژی 7-12-2022، لیژنەی گواستنەوە و گەیاندن لە پەرلەمانی عێراق پشتیوانی لە هەنگاوی دابەزاندنی نرخی کارتی ئینتەرنێت و مۆبایل کرد. کاروان یاروەیس، ئەندامی لیژنەی گواستنەوە و گەیاندن ئەوکات گوتی: "ئێستا بارودۆخی دارایی عێراق باشە و نرخی نەوت بەزربووەتەوە و داهات باشە، بۆیە کار بۆ ئەوە دەکرێت باج لەسەر کارتی مۆبایل هەڵبگیرێت."