ئاسیاسێڵ: ئامادەین بۆ کەمکردنەوەی نرخی کارتی مۆبایل

 

ئەنجوومەنی وەزیرانی عێراق لە کۆبوونەوەی رۆژی 22-11-2022یدا بڕیاری دا، نرخی کارتێکی پێنج هەزاری لە شەش هەزار و 250 دینارەوە ببێتە پێنج هەزار و کارتی 10 هەزاریش لە 12 هەزار و 500 دینارەوە ببێتە 10 هەزار دینار.

 

لەبارەی ئەو بڕیارەی حکومەتەوە، هیام یاسری، وەزیری گەیاندنی عێراق راگەیێندراوێکی بڵاوکردەوە و ئاماژەی بەوە کرد، سوپاس و پێزانین بۆ محەممەد شیاع سوودانی، سەرۆکوەزیرانی عێراق کە پشتیوانیی گەورە بوو لە دابەزینی نرخی کارتی مۆبایل و ئینتەرنێت. گوتیشی: "سوپاس بۆ وەزیرانەکان کە دەنگیان بۆ ئەو بڕیارە داوە لەگەڵ ئەندامانی پەرلەمانی عێراق لە سەرووی هەموویانەوە محەممەد عەلی ئەکبەر مەندەلاوی، جێگری سەرۆکی پەرلەمان و سەرۆکی فراکسیۆنەکان و چالاکییەکانی کۆمەڵگە، کە سەرجەمیان پشتیوانی ئەو بڕیارە بوون، کە خزمەت بە چینێکی فراوانی گەلی عێراق دەکات لە هەژاران و ئەوانەی داهاتیان سنوودارە. 

 

ئەمڕۆ چوارشەممە 23-11-2022 کۆمپانیای ئاسیاسێڵ راگەیێندراوێکی لەوبارەوە بڵاوکردەوە و ئاماژەی بەوەکرد، بڕیارەکە دەبێتە مایەی کەمکردنەوەی بارگرانی لەسەر شانی بەشداربووان و گوتیشی: "بۆیە ئەنجوومەنی وەزیران بڕیاری دا بە لابردنی ئەو باجی فرۆشتنەی خرابووە سەر کارتەکانی پڕکردنەوە کە بڕەکەی (%20) بوو، لە 1ی كانوونی یەکەمی 2022 ــەوە، ئەنجوومەنی ناوبراو کۆمسیۆنی گەیاندن و راگەیاندن 'CMC'ی راسپارد بۆ جێبەجێكردنی ئەم بڕیارە بە گرتنەبەری رێوشوێنی گونجاو بۆ جێبەجێکردنی بڕیارەکە".

 

لە راگەیێندراوەکەی کۆمپانیای ئاسیاسێڵدا هاتووە: "ئاسیاسێڵ ئامادەیی تەکنیکی و رێکخراوەیی خۆی دووپاتدەکاتەوە بۆ جێبەجێکردنی ئەم بڕیارە کە ئاسیاسێڵ چەندین ساڵە کاردەکات بۆ پەسندکردنی لە رێگەی پێشکێشکردنی چەندین داواکاری و گفتوگۆکردنی لەگەڵ دەسەڵاتەکانی یاسادانان و جێبەجێکردن".

 

وەزیری گەیاندنی عێراق دەڵێت، لە 1-12-2022وەوە کار بە بڕیاری کەمکردنەوەکە دەکەن. 

  

لە ساڵی 2015ـەوە بەپێی یاسای بودجە، بە رێژەی 20% باجی سەر کارتی مۆبایل و ئینتەرنێت لە عێراق زیادکرا و لە یاسای بوودجەدا جێگیر کرا.

  

وەزیری گەیاندنی عێراق دەڵێت، لە بنەڕەتدا پێویستبوو زیادکردنی ئەو 20%ـەی باجی سەر کارتی مۆبایل کۆمپانیاکان بیدەن، نەک خەڵکی هەژار. دەشڵێت، "بەڵام ئەوکات هاووڵاتییان هەڵوێستێکی شەرەفمەندانەیان هەبوو کە لەپاڵ دەوڵەت وەستانەوە و لە گیرفانی خۆیان ئەو باجەیان دا، بۆیە ئێستا پێویستە وەڵامێکی جوانی هاووڵاتییان بدەینەوە."

 

رۆژی 7-12-2022، لیژنەی گواستنەوە و گەیاندن لە پەرلەمانی عێراق پشتیوانی لە هەنگاوی دابەزاندنی نرخی کارتی ئینتەرنێت و مۆبایل کرد. کاروان یاروەیس، ئەندامی لیژنەی گواستنەوە و گەیاندن ئەوکات گوتی: "ئێستا بارودۆخی دارایی عێراق باشە و نرخی نەوت بەزربووەتەوە و داهات باشە، بۆیە کار بۆ ئەوە دەکرێت باج لەسەر کارتی مۆبایل هەڵبگیرێت."