بەرپرسێکی یەکێتی: تێکڕای خێزانێکی عەرەب لە کەرکووک زیاتر لە 10 کەس و کورد کەمتر لە 7 کەسن

 

 

عەلی قەڵایی، بەرپرسی سەنتەری هەڵبژاردنی سەڵاحەدین و کەرکووکی یەکێتی دەڵێت، "ئەم دۆخەی ئێستا لە بەرژەوەندیی عەرەبە، ئەگەر بەردەوامی هەبێت، پێشبینی دەکەم تاوەکو دوو هەڵبژاردنی داهاتووی ئەنجوومەنی پارێزگای کەرکووک و تاوەکو ساڵی 2032 عەرەب وەکو تاک دەبێتە زۆرینە و مەترسییەکی گەورەیە لەسەر کەرکووک، ئەمەش پەیوەندیی بە ئەمنی قەومیی کوردەوە هەیە."

 

ژمارەی دانیشتووانی کەرکووک لە ساڵی 2003وە بە شێوەیەکی بەرچاو زیادیکردووە، بە جۆرێک لە نزیکەی 700 هەزار کەسەوە گەیشتووەتە زیاتر لە ملیۆنێک و 500 هەزار کەس کە زۆرینەی زیادبوونەکە لەنێو عەرەبدایە.

 

کورد لە هەشت ساڵی رابردوودا 110 پۆستی لەدەستداوە؛ 9 گەڕەکی عەرەبی لە شاری کەرکووک دروستکراون، هەر گەڕەکێک جارێک یان دوو جار لە گەڕەکی رەحیماوە و شۆریجە گەورەترە؛ لە گەورەترین گەڕەکەکانی هەولێر، سلێمانی و دهۆکیش گەورەترە.

 

فەهمی بوورهان، سەرۆکی دەستەی ناوچە کوردستانییەکانی دەرەوەی ئیدارەی هەرێمی کوردستان ئاماژەی بەوە کرد، "زیاتر لە 35 هەزار منداڵی عەرەب لە قوتابخانەی سەرەتایی چوونەتە ئامادەیی، کۆی منداڵی کورد کەمتر بووە لە 8000 و منداڵی تورکمانیش کەمتر بووە لە 1500، ئایا ئەمە بەس نییە بۆئەوەی ئێمە تێبگەین کە حەجمی کورد و پرسەکەمان لە ناوچەکە چۆن لە پاشەکشەدا بووە؟ ئەمە مەترسییەکی قووڵە، واتە وردە وردە هەژموونی تەعریب دێتە ناو هەموو جەستەی خاکەکەمان و تەعریبەکەش تەنیا بەعەرەبکردن نییە، بەڵکو حاڵەتی مەزهەبییش چووەتە ناو پرسەکانەوە."

 

هۆکارێکی دیکەی زیادبوونی ژمارەی عەرەب پەیوەندیی بە وەچەخستنەوەوە هەیە، هەر خێزانێکی عەرەب ژمارەی خێزانەکەی تێکڕا لە 10 کەس کەمتر نییە؛ زۆرترینیشیان 16 بۆ 17 سەر خێزانن. خێزانی کورد لە کەرکووک ژمارەیان 6 بۆ 7 کەس دەبێت.