تورکیا و پەکەکە ئاماری شەڕ لە هەرێمی کوردستان بڵاودەکەنەوە

وەزارەتی بەرگریی تورکیا رۆژی سێشەممە، 23-7-2024، بڵاویکردەوە، سوپای وڵاتەکەی لە ناوچەی ناسراو بە ئۆپەراسیۆنی چنگ-قوفڵ دەستی بەسەر بڕێکی زۆر چەک، تەقەمەنی و کەرەستەی سەربازیی پەکەکەدا گرتووە. 

 

لە راگەیێندراوەکەدا زانیاری سەبارەت بەو چەک و تەقەمەنییە خراوەتەڕوو و دەڵێت، هەزار گولـلە دۆشکە، حەوت گولـلەی 107 ملیمەتر، 10 مین، شەش گولـلە هاوەن، دوو کۆگای ئاو و پێداویستیی جۆراوجۆری رۆژانە دەستیان بەسەردا گیراوە.

 

ئەم راگەیێندراوە لە کاتێکدایە، رۆژی 22-7-2024 ناوەندی راگەیاندن و چاپەمەنیی هێزەکانی پاراستنی گەل (هەپەگە) رایگەیاند، گەریلاکان لە رۆژانی 20 تاوەکو 22ـی تەمموز 9 چالاکییان دژی سوپای تورکیا لە ناوچەکانی مەتین و زاپ لە پارێزگای دهۆک ئەنجام دا.

 

هەدەپە کە باڵی سەربازیی پەکەکەیە، کوژرانی سەربازێکی سوپای تورکیا و تێکشکاندنی کامێرایەکی چاودێری راگەیاند و گوتی، لە ئەنجامی ئەو چالاکییانەدا سەربازانی تورکیا پاشەکشەیان پێکراوە.

 

تورکیا بەرەبەیانی رۆژی 18ـی نیسانی 2022 لە ناوچەکانی ئاڤاشین، مەتین و زاپ لە خاکی هەرێمی کوردستان دەستی بە ئۆپەراسیۆنێک بۆ سەر پێگەکانی پەکەکە دەستیپێکرد. 

 

شەڕ و پێکدادانی سوپای ئەو وڵاتە و گەریلاکان لەو ناوچانەدا درێژەی هەیە و چەند هەفتەیەکە شەڕەکە بە تایبەتی لە سنووری قەزای ئامێدی چڕبوونەتەوە.