مامۆستایەکی ئایینی لە ئاکرێ دوای بڵاوبوونەوەی دەنگۆی مردنی: نە شەهیدکراوم و نە مردووم
رووداو دیجیتاڵ
مامۆستایەکی ئایینی لە قەزای ئاکرێی سنووری پارێزگای دهۆک کە ئەمڕۆ وێنەکەی بڵاوکرایەوە و گوایە کوژراوە، قسەی بۆ رووداو کرد و دەڵێت، "نەکوژراوم و ئەو کەسانەش ئەو هەواڵەیان بڵاوکردووەتەوە حەواڵەی خودایان دەکەم."
یەکێک لە هەواڵە ناڕاستەکانی ئەمڕۆی بەشێک لە پەیج و سۆشیاڵ میدیای کوردستان بڵاوکردنەوەی هەواڵی "کوشتن" و "خۆکوشتن"ـی مامۆستایەکی ئایینی بەناوی "مەلا عەبدوڵڵا سوورچی" بوو، بەڵام دوای بەدواداچوون بۆ هەواڵەکە لەلایەن تۆڕی میدیایی رووداوەوە، دەرکەوت هەواڵەکە ناڕاست و ساختەیە.
مامۆستا عەبدوڵڵا حوسێن، ناسراو بە مەلا عەبدوڵڵا سوورچی، لەدایکبووی 1969ـیە و نیشتەجێی قەزای ئاکرێیە.
ئەو مامۆستایە دوای بڵاوبوونەوەی هەواڵی گیانلەدەستدانی بە تەلەفۆن بە رووداوی گوت، "نەمردووم. ئەو کەسانەی ئەو هەواڵەیان بڵاوکردووەتەوە حەواڵەی خودایان دەکەم. نە شەهیدکراوم و نە مردووم. زیندوومە، سوپاس بۆ خودا."
ئەو مامۆستا ئایینییە لە ساڵی 1996ـەوە پێشنوێژ و وتارخوێنە لە مزگەوتی شۆڕشی قەزای ئاکرێی سەر بە پارێزگای دهۆک.
مامۆستا عەبدوڵڵا بە رووداوی گوت، "مەمنوونتانم هەواڵەکە زوو بڵاوبکەنەوە. ئەو ناو و وێنەیەی بڵاوکراوەتەوە منم، بەڵام نەمردووم."