لە هێرشێکدا بە فڕۆکەی F16 حەوت چەکداری داعش لە خورماتوو کوژران

 

شانەی راگەیاندنی ئەمنیی عێراق لە راگەیێندراوێکدا بڵاویکردەوە، شەوی رابردوو بە سەرپەرشتی و پلانی فەرماندەیی ئۆپەراسیۆنە هاوبەشەکان، دەزگای هەواڵگریی نیشتمانی بە بەشداری دەزگای دژەتیرۆری عێراق، پاڵپشت بە زانیاریی وردی هەواڵگری و بە هاوکاریی هێزی ئاسمانی، لە چیای پەلکانەی قەزای خورماتوو ئۆپەراسیۆنێکیان لە دژی چەکدارانی داعش کردووە.

 

شانەی راگەیاندنی ئەمنیی عێراق، دەزگای هەواڵگریی نیشتمانیی و دەزگای دژەتیرۆری عێراق شوێنی چەکدارانی داعشیان دیاریکردووە، گەمارۆیان داون، بە فڕۆکەی ئێف 16ـش هێرشیان کردوونەتە سەر، بەهۆیەوە سەرجەم چەکدارەکان کوژراون، کە بەگوێرەی زانیارییە بەراییەکان 7 چەکدارن، یەکێکیان سەرکردەیەکی مەترسیدارە.

 

لە سێ رۆژی رابردوودا ئەوە دووەمجارە بە فڕۆکە هێرش دەکرێتە سەر چەکدارانی داعش. رۆژی پێنجشەممە، 20-06-2024 شانەی راگەیاندنی ئەمنیی عێراق رایگەیاند، لە ناوچەی وادی شای لە سنووری فەرماندەیی ئۆپەراسیۆنەکانی کەرکووک، بە فڕۆکەی F16ـی سوپای عێراقی گرووپێکی سێ کەسی چەکدارانی داعش و مۆڵگە، ئەشکەوت و توونێلەکانیان کراونەتە ئامانج. 

  

بەپێی توێژینەوەیەکی سەنتەری رافیدەین بۆ دیالۆگ، کە سەنتەرێکی عێراقییە، لە ساڵی 2023ـدا داعش 189 هێرشی لە ناوچە جیاجیاکاندا کردووە. زۆرترینی کردەوەکانی داعش بەپێی پارێزگاکانی داعش لە پارێزگای ئەنبار بووە بە 47 کردەوە، لە پارێزگای کەرکووک 39 کردەوە و لە پارێزگای دیالە 37 کردەوەی کردووە.

  

بەپێی توێژینەوەکە کە پشتی بە داتای دامەزراوە فەرمییەکانی عێراق بەستووە، هێرشەکانی داعش لە چوار ساڵی رابردوودا بەمشێوەیە بوون: 

 

- ساڵی 2020: 1459 کردەوە

- ساڵی 2021: 1113 کردەوە

- ساڵی 2022: 484 کردەوە

- ساڵی 2023: 189 کردەوە

 

لە توێژینەوەکەدا دەردەکەوێت کردەوەکانی داعش لەنێوان شەڕی راستەوخۆ بە چەک و نارنجۆک تاوەکو چاندنی بۆمب و کردەوەی دیکە بووە بە پێچەوانەی هێرشەکانی پێشووی کە زیاتر پشتی بە خۆکوژ و ئۆتۆمبێلی بۆمبڕێژکراو و چەکی قورس دەبەست.

   

رێکخراوی داعش لە حوزەیرانی ساڵی 2014 هێرشی کردە سەر شاری موسڵی ناوەندی پارێزگای نەینەوا و کۆنترۆڵی کرد، لە 2017 کۆتایی بە دەسەڵاتی داعش لە پارێزگاکە و ناوچەکانی دیکەی عێراق هێنرا. مەزەندە دەکرێت داعش لەو ماوەیەدا نزیکەی 20 هەزار کەسی کوشتبێت.