پوورزایەکی ئەو قوتابییەی پۆلی 12 کە بە رووداوی هاتووچۆ مرد: ئاواتی ئەوە بوو خوێندن تەواو بکات

 

 

زانیار خواکەرەم کافرۆشیی 22 ساڵ، نزیکەی کاژێر 07:00ی بەیانی بە ئۆتۆمبێلێکی جۆری پیکاب بەڕێکەوتووە بۆ چەمچەماڵ، بەڵام لە رێگەی نێوان تەکیە - چەمچەماڵ، کە بە تەنیا خۆی بووە، ئۆتۆمبێلەکەی وەرگەڕا.

 

عەزیز ئەحمەد، پوورزای زانیار دەڵێت، "نزیکەی کاژێر 08:30 پەیوەندییان کرد کارەساتێکی لەو جۆرە روویداوە. بۆ تاقیکردنەوەی نیشتمانی چووبوو بۆ چەمچەماڵ، بەڵام لە رێگە تووشی ئەو کارەساتە بوو، هەموومان بۆی بەداخین."

 

بە گوتەی هاوڕێ و کەسە نزیکەکانی، زانیار بەهیوا بوو خوێندنەکەی تەواو بکات و کارێکی باشی دەستبکەوێت.

 

بڕیار رۆکان، هاوڕێی زانیار گوتی، "هەر لە منداڵییەوە هاوڕێین، پێکەوە خوێندمان و دواتر ماوەیەک وازمان لە خوێندن هێنا و پێکەوەش کارمان دەکرد، خەونی ئەوە بوو کە خوێندنەکەی تەواو بکات، دوو ساڵیش بوو هەر بە دەرەکی دەیخوێند."

 

ئارام ئەحمەد، پوورزای زانیار باسی لەوە کرد، "خەون و ئاواتی هەر گەنجێک ئەوەیە خوێندنی قوتابخانەی تەواو بکات، پاشان بچێتە زانکۆ یان پەیمانگا و دواتر بگات بەو ئاواتەی هەیەتی."

 

زانیار دانیشتووی گوندی سەرچاوەی قەزای بازیانە و لە قوتابخانەیەکی تەکیە دەیخوێند، بۆ تاقیکردنەوەش دەچووە چەمچەماڵ، بەڵام نەگەیشت بەوەی یەکەم تاقیکردنەوەی بکات و گیانی سپارد.