راپۆرتی ژووری پزیشکانی مێردین: بەشی چارەسەری سووتانمان نییە

 

ژووری پزیشکانی مێردین ئەمڕۆ یەکشەممە، 23-6-2024، راپۆرتێکی لەبارەی ئاگرەکەی رۆژی 20-6-2024 بڵاوکردەوە کە ناوچەیەکی نێوان ئامەد و مێردینی گرتەوە. لەو راپۆرتەدا ئاماژە بە گیانلەدەستدانی 15 کەس و برینداربوونی 74 کەس لە ئەنجامی کەوتنەوەی ئاگرەکە کراوە.

 

هەر لە ئەنجامی ئەو ئاگرە، زیاتر لە هەزار و 500 ئاژەڵی بچووک لەنێوچوون و نزیکەی 50 دۆنم زەوی سووتا.

 

لە راپۆرتەکەدا هاتووە، ئاگرەکە لە شەودا کەوتووەتەوە، بۆیە دەرفەتی رزگارکردن کەمتر بووە. هەروەها نووسراوە: "بەهۆی ئەوەی بەشی سووتان لە پارێزگاکەماندا نییە، بەشێک لە سووتاوەکانمان ناردنە پارێزگاکانی دەوروبەر. ئەوە لە کاتێکدایە سووتان دۆخێکی ناسکە و پێویستە راستەوخۆ چارەسەر بکرێت. ناردنی سووتاوەکان بۆ شارێکی دیکە وایکرد، ژمارەی گیانلەدەستدان زیاتر بێت".

 

نیوەشەوی 20ـی مانگ، ئاگرێکی گەورە لە گوندی تۆبینی سەر بە شارۆچکەی چناری ئامەد و گوندی هەربەرێی سەربە شارۆچکەی شەمرەخی مێردین کەوتەوە.

 

ئاگرەکە لە ماوەیەکی زۆر کورتدا لە کۆنترۆڵ دەرچوو و زەویوزاری هەشت گوندی گرتەوە. لێکۆڵینەوە لە هۆکاری کەوتنەوەی ئاگرەکان بەردەوامە. 

 

کۆمپانیای دیجلە بۆ دابەشکردنی کارەبا ناسراو بە دەداش بە کەوتنەوەی ئاگرەکە تۆمەتبار دەکرێت، بەڵام کۆمپانیاکە ئەو تۆمەتە رەتدەکاتەوە و لەسەر ئەوەش سکاڵای دژی هاونیشتمانییەک تۆمار کردووە.