فراکسیۆنی یەکێتی: کۆمیسیۆن کارا نەکراوەتەوە و شتێک نییە بە ناوی ئەنجوومەنی کۆمیسیاران
رووداو دیجیتاڵ
ئەمڕۆ نووسراوی پەرلەمانی كوردستان بۆ كاراكرنەوەی كۆمیسیۆنی باڵای هەڵبژاردنەکان گەیشتە كۆمیسیۆن، سەرۆکی فراکسیۆنی یەکێتی لە پەرلەمانی کوردستان دەڵێت: "ئێمە و پارتی رێککەوتنمان هەیە کە تاکلایەنە بڕیار نەدەین و ئەوەی دوێنێ لە پەرلەمان روویدا پێچەوانەی رێککەوتنەکان بوو." دەشڵێت، "کۆمیسیۆن کارا نەکراوەتەوە و شتێک نییە بە ناوی ئەنجوومەنی کۆمیسیاران."
ئەمڕۆ سێشەممە، 23-5-2023، زیاد جەبار، سەرۆکی فراکسیۆنی یەکێتی لە پەرلەمانی کوردستان بە تۆڕی میدیایی رووداوی گوت: "ئەنجوومەنی کۆمیسیاران کارانەکراوەتەوە و شتێک نییە بە ناوی ئەنجوومەنی کۆمیسیاران. هەڵگرتن و کۆتاییهاتنی دانیشتنی پەرلەمان لە دەسەڵاتی سەرۆکی پەرلەمانە و لەدوای قسەکانی سەرۆکی پەرلەمان کۆبوونەوە نەبووە و ئاژاوە هەبوو."
سەرۆکی فراکسیۆنی یەکێتی لە پەرلەمانی کوردستان دەشڵێت: "دوێنێ سەرۆکی پەرلەمان کۆتایی بە دانیشتنەکە هێنا و شتێک نییە بە ناوی دانیشتنی پەرلەمان و ئەوەی لە پەرلەمان روویدا پێچەوانەی رێککەوتنەکانی پارتی و یەکێتی بوو."
زیاد جەبار لەبارەی کاراکردنەوەی کۆمیسیۆنی باڵای هەڵبژاردنەکان گوتی: "لە کۆبوونەوەی دوێنێی پەرلەمان کۆمیسیۆن کارا نەکراوەتەوە و دەبێت لەسەر ئەو بابەتە لەگەڵ پارتی و لایەنەکان کۆببینەوە."
ئەو قسانەی سەرۆکی فراکسیۆنی یەکێتی لە پەرلەمانی کوردستان لەکاتێکدایە، هەر ئەمڕۆ، هەندرێن محەممەد، سەرۆكی كۆمیسیۆنی باڵای سەربەخۆی هەڵبژاردن و راپرسیی هەرێمی كوردستان بە تۆڕی میدیایی رووداوی گوت، بەیانیی ئەمڕۆ سێشەممە بۆ كاراكرانەوەی كارەكانی كۆمیسیۆنی باڵای سەربەخۆی هەڵبژاردن و راپرسیی هەرێمی كوردستان نووسراوی فەرمیی پەرلەمانی كوردستان گەیشتووەتە دەستیان و گوتی: "ئێمە كار بەو نووسراوە دەكەین لە هەفتەی داهاتووە دەست بە ئامادەكارییەكانی هەڵبژاردن دەكەین".
ناردنی ئەو نووسراوە لە کاتێکدایە، "کاراکردنەوە"ـی کۆمیسیۆن لە دانیشتنی دوێنێی پەرلەمان مشتومڕی ناوەتەوە، پارتی دەڵێت کۆمیسیۆن بە دەنگی 58 پەرلەمانتار کارا کراوەتەوە، هەرچی یەکێتییە دەڵێت: کۆمیسیۆن کارا نەکراوەتەوە، چونکە سەرۆکی پەرلەمان بە پشتبەستن بە مادە 18ی پەیڕەوی ناوخۆ دانیشتنەکەی کۆتایی پێهێناوە.
ماوەی یاسایی ئەندامێتیی ئەنجوومەنی کۆمیسیارانی کۆمیسیۆنی باڵای سەربەخۆی هەڵبژاردن و راپرسی لە رۆژی 23-12-2019ـەوە تەواو بووە، بۆیە تاوەکو کۆمیسیۆن کارا نەکرێتەوە، ناتوانێت سەرپەرشتیی هیچ پرۆسەیەکی هەڵبژاردن بکات.
ئەندامانی کۆمیسیاران پێکدێن لە هەندرێن محەممەد ساڵح، سەرۆک- پارتی، عەلی ساڵح مەحموود -پارتی (سوێندی یاسایی نەخواردووە)، نەهرۆ سەلیم حەنا -یەکێتی، سلێمان مستەفا حەسەن -یەکێتی، رێزان حەمەڕەشید کەریم -گۆڕان، عەبدولسەمەد خزر عەبدوڵڵا -گۆڕان، شێروان زرار نەبی -کۆمەڵ، ئیسماعیل حەمەعەلی عەبدولقادر -یەکگرتوو و، کامەران نەشئەت بەکر -تورکمان (سوێندی یاسایی نەخواردووە).
پێشتر سەرۆكی هەرێمی كوردستان رۆژی 18-11-2023 وەك رۆژی هەڵبژاردنی پەرلەمانی كوردستان دیاری كرد، کۆمیسیۆنیش دەڵێت شەش مانگ کاتی پێویستە تاوەکو ئامادەکارییەکانی هەڵبژاردن تەواو بکات.