رووداو دیجیتاڵ
فەرماندەیی هێزەکانی پاراستنی گەل- هەپەگە، ناسنامه‌ی چوار گەریلای پارتی کرێکارانی کوردستان - پەکەکە ئاشكرا ده‌كات و دەڵێت، لە شه‌ڕ و پێكدادان له‌گەڵ سوپای تورکیا لە هەرێمی کوردستان گیانیان لەدەستداوە.
ئەمڕۆ هەینی، ناوەندی راگەیاندن و چاپه‌مه‌نیی هێزەکانی پاراستنی گەل- هەپەگە ناسنامەی ئەو چوار گەریلایەی بڵاوکردەوە و دەڵێت، لە رۆژی 11ـی ئابی 2018 لە ناوچەی ئاڤاشین لە هەرێمی کوردستان لە شەڕ و پێکدادان لەگەڵ سوپای تورکیا گیانیان لەدەستداوە.
ناسنامەی گەریلاکان بەم جۆرەیە: عوسمان کڵچ ناسراو بە ئاگید زازا لەدایکبووی چەولیگی باکووری کوردستان؛ ئیسلام ئۆزدەمیر ناسراو بە ئاگر ئوموت ژیرکی لەدایکبووی بوردور لە تورکیا؛ عەبدولرەحمان یاشا ناسراو بە سەرهاد پارتیزان لەدایکبووی ئامەد و دۆغان یوزگولەچ ناسراو بە خەیری ئازاد لەدایکبووی وان.
نزیکەی 40 ساڵە شەڕی نێوان پارتی کرێکارانی کوردستان و سوپای تورکیا بەردەوامە و بەشێکی سەرەکی ئەو شەڕەش لەنێو خاکی هەرێمی کوردستان، بە تایبەتی لە ناوچە شاخاوییەکانی سنووری پارێزگای دهۆک دەکرێت.
21ـی شوباتی 2024، ناوەندی چاپەمەنی و راگەیاندنی هەپەگە، کوژرانی دوو سەربازی سوپای تورکیا و برینداربوونی سەربازێکی دیکەی لە ناوچەی زاپ لە پارێزگای دهۆک بڵاوکردەوە و رایگەیاند، لە 48 کاژێردا چوار جار هێرشیان کردووەتە سەر پێگەکانی سوپای تورکیا لەو ناوچەیە.
رۆژی 22ـی شوبات، وەزارەتی بەرگریی تورکیا لە راگەیێندراوێکدا گیانلەدەستدانی چوار گەریلای پەکەکە لە خاکی هەرێمی کوردستان بڵاوکردەوە.
1ـی شوباتی ئەم ساڵ، هەپەگە ئاماری شەڕوپێکدادانەکانی پەکەکەی لەگەڵ سوپای تورکیا لە خاکی هەرێمی کوردستان بڵاوکردەوە و رایگەیاند، لە یەکەم مانگی ئەم ساڵدا 99 سەربازیان کوشتووە و سێ گەریلاش گیانیان لەدەستداوە.
هەمان رۆژ لیوا زەکی ئاکتورک، گوتەبێژی فەرمانگەی پەیوەندییەکان و راگەیاندنی وەزارەتی بەرگریی تورکیا لە کۆنفرانسێکی رۆژنامەڤانیدا رایگەیاند، لە ماوەی هەفتەیەکدا و لە ئەنجامی بۆردوومانەکانیان 63 گەریلا و شەڕڤان گیانیان لەدەستداوە؛ 21یان گەریلا بوون.
کۆمێنتەکان
وەک میوان کۆمێنتێك بنووسە یان وەرە ژوورەوە و هه‌موو خزمەتگوزارییەکان به‌كاربێنه
کۆمێنتێک دابنێ