رووداو دیجیتاڵ
بەهۆی تێکچوونی دۆخی تەندروستیی دایکی، سەلاحەددین دەمیرتاش بە فڕۆکەیەکی تایبەت گوازرایەوە بۆ نەخۆشخانەی ئامەد تاوەکو سەردانی بکات.
دوو رۆژ بەر لە ئێستا، سەعدییە دەمیرتاش، دایکی سەلاحەدین دەمیرتاش، بەهۆی تێکچوونی لەناکاوی تەندروستییەوە، گوازرایەوە نەخۆشخانە و ئەمڕۆ سێشەممە 23ـی کانوونی دووەمی 2024، بەهۆی خراپبوونی زیاتری تەندروستییەوە، گوازرایەوە بەشی چاودێریی چڕی هەمان نەخۆشخانە.
رۆژی 22ـی مانگ، سەلاحەدین دەمیرتاش لە رێگەی پارێزەرەکانییەوە داوای کردبوو رێگەی پێ بدرێت بۆ سەردانی دایکی. ئەمڕۆش لە گرتووخانەی سزا قورسەکانی ئەدیرنەوە بە فڕۆکەیەکی تایبەت گەیێندرایە ئامەد و بە یاوەری پارێزەرانی سەردانی دایکی کرد.
دایکی دەمیرتاش، دوای کۆچی دوایی تاهیر دەمیرتاشی هاوژینی، تەندروستیی خراپ بوو. لەم ماوەیەدا دوو جار لە نەخۆشخانە خەوێندراوە.
رۆژی 6ـی ئایاری 2023، دەمیرتاش بۆ سەردانی تاهیر دەمیرتاش-ی باوکی داوایەکی ئاراستەی وەزارەتی داد کردبوو بۆ سەردانی باوکی لە نەخۆشخانە و سەردانیشی کرد.
باوکی دەمیرتاش، رۆژی 31ـی کانوونی یەکەمی 2023، لە بەشی چاودێری چڕی نەخۆشخانەی گشتیی ئامەد، کۆچی دواییکرد. سەلاحەدین دەمیرتاش، بەشداری لە پرسەی باوکیدا نەکرد.
کۆمێنتەکان
وەک میوان کۆمێنتێك بنووسە یان وەرە ژوورەوە و هه‌موو خزمەتگوزارییەکان به‌كاربێنه
کۆمێنتێک دابنێ