کۆمپانیایەکی ئەمریکی بووە ئەندامی کۆمەڵەی پیشەسازیی نەوتی کوردستان

 

لە راگەیێندراوەکەی ئەپیکور کە ئەمڕۆ یەکشەممە، 22-10-2023، بڵاویکردەوە هاتووە، کۆمپانیای هەنت ئۆیڵ میدڵ ئیست (Hunt Oil Middle East Limited) بووە شەشەمین کۆمپانیای نێودەوڵەتیی نەوت، وەکو ئەندامی کۆمەڵەی پیشەسازیی نەوتی کوردستان. 

 

کۆمپانیاکە، لە ساڵی 2007ـەوە نەوتی لە ئەمریکا و هەرێمی کوردستان بەرهەمهێناوە و بەدوایدا گەڕاوە. هاوکات لە رۆژهەڵاتی نێوەڕاستدا وەبەرهێنانی بەرچاوی لە بواری نەوت و گازدا کردووە و چەندین بیری نەوتی لە رۆژهەڵاتی نێوەڕاست، ئەمریکا و هەرێمی کوردستان هەڵکەندووە. 

 

بەگوێرەی وەزارەتی سامانە سروشتییەکانی حکومەتی هەرێمی کوردستان، کۆمپانیای هەنت ئۆیڵ بە رێژەی 81٪ـی کارمەندەکانی ناوخۆیین و 19٪یشی بیانین. 

 

کۆمەڵەی پیشەسازی نەوتی کوردستان (ئەپیکور-APIKUR) کۆمەڵەیەکی وەبەرهێنانی بواری نەوت و گازە. لە مانگی شوباتی 2023 لەلایەن کۆمپانیاکانی DNO، Genel Energy، Gulf Keystone Petroleum، HKN Energy و ShaMaran Petroleum دامەزراوە. ئەم کۆمپانیا نێودەوڵەتییانەی نەوت و گاز، لە هەرێمی کوردستان چالاکن. 

 

کۆمەڵەی پیشەسازیی نەوتی کوردستان - ئەپیکور، لەبارەی کۆمەڵەکەیەوە دەڵێت "ئامانجمان راکێشانی سەرنجی کۆمپانیا نێودەوڵەتییەکانی نەوت و گاز، وەبەرهێنەر و کۆمپانیاکانی خزمەتگوزارییە تاوەکو هەرێمی کوردستان بکەنە شوێنی وەبەرهێنان."