بەهۆی شەڕی تورکیا و پەکەکەوە 'هەزاران دۆنم دارستان' لە سنووری دهۆک سووتاون
رووداو - دێرەلووک
بەهۆی تۆپبارانی سوپای تورکیا بۆسەر پێگەکانی پەکەکە، ئاگر لە دارستانی گوندی سەرگەلێ لە سنووری دێرەلووک کەوتەوە. هەرچەندە چوونە ناوچەکە قەدەخە بوو، بەڵام بەشێک لە خەڵک بە ناچاری چوون بۆ کوژاندنەوەی ئاگرەکە.
شێروان رەشید، دانیشتووی گوندی سەرگەلێ دەڵێت، لەسەر بەرپرسیارێتیی خۆیان لە کاژێر 09:00 تاوەکو کاژێر 02:00ی پاشنیوەڕۆ چوون ئاگرەکە بکوژێننەوە، بەڵام تاوەکو کاژێر 12:00ی شەو ئاگرەکە هەر بەردەوام بووە.
بەهۆی بۆردوومان و تۆپبارانی سوپای تورکیا بۆسەر پێگەکانی پەکەکە لە شەش مانگی رابردوودا، خانووی هاونیشتمانییەک درزی بردووە و مەترسیی رووخانی لەسەرە؛ هەندێک جاریش فڕۆکە لەنزیک گوندەکەیان بۆردوومان دەکات و پاشماوەی تەقەمەنی دەکەوێتە نێو گوندەکە.
خۆشەڤی سەلیم، دانیشتووی گوندی سەرگەلێ دەڵێت، شەوان بۆردوومان و تۆپباران هەیە، جاری وا هەیە بە دۆشکە و بیکەیسی شەڕ دەکرێت.
زۆربەی ئەو ناوچانەی کە ئاگر تێیاندا کەوتووەتەوە، هاتووچۆ تێیاندا قەدەخەیە، هەربۆیە زیانە مادییەکانی بەتەواوی نازانرێت.
کاوە سەبری، بەڕێوەبەری دارستان و پاوان لە دهۆک دەڵێت، "هەزاران دۆنم دارستان لە دەڤەری سنووری و بەرێگارێ و نهێلی سووتاون. زیانێکی گەورە بە ژینگەی ناوچەکە گەیشتووە."
بەپێی بەدواداچوونی تۆڕی میدیایی رووداو، لە ماوەی مانگێکدا نزیکەی 170 دۆنم دارستانی گوندی سەرگەلی سووتاون، کە پاوانی گوندەکە بووە.