بەهۆی ئاگرکردنەوەی کەسێک 120 دۆنم زەوی قەرەداخ سووتا

روواو - سلێمانی

لە سنووری قەرەداخ بەهۆی ئەوەی کەسێک ئاگری لە پووش و پاوان بەردا، 120 دۆنم زەوی سووتا کە لە باخی میوە و سەدان داربەڕوو پێکهاتووە. 
 
هێمن کەمەرخان، گوتەبێژی پۆلیسی دارستان و ژینگەی سلێمانی بە تۆڕی میدیایی رووداوی راگەیاند "ئەو کەسەی پاوانەکەی سووتاندووە، خاوەنی زەوییەکە نەبووە".

بەگوتەی هێمن کەمەرخان هەر بەهۆی ئەو ئاگرەوە 120 دۆنم زەوی کە پێکهاتووە لە سێ باخی میوە و زیاتر لە دوو هەزار دار بەڕوو لەو سنوورە سووتاون.

لە دوای ئەوەی پۆلیسی دارستان و ژینگە ئاگادارکراونەتەوە "دەستبەجێ" به‌شی پۆلیسی دارستان و ژینگه‌ی قه‌ره‌داخ گه‌یشتوونەتە‌ شوێنی رووداوه‌كه‌ و توانیویانە به‌ هاوكاریی ئاگركوژێنه‌وه‌ و هاونیشتمانیانی سنووره‌كه‌، له‌ ماوه‌ی دوو کاژێردا ئاگره‌كه‌ كۆنترۆڵ بكه‌ن.

 
سەبارەت بە چارەنووسی ئەو کەسەی ئاگری لە پووش و پاوانەکە بەرداوە، گوتەبێژەکەی پۆلیسی دارستان و ژینگەی سلێمانی دەڵێ "ئەو کەسە دەستبەسەرکراوە و په‌ڕاوی لێكۆڵینه‌وه‌ رێكخراوه‌ و راده‌ستی دادوه‌ر كراوه‌ بۆ گرتنەبەری رێكاری یاسایی".

• به‌شی بكه‌ لە
• Share on Facebook
• Share on Twitter
• Share on Whatsapp
• Share on Telegram
• Share on Viber
• Share on Messenger