ئاگر لە دارستانەکانی بانە، مەریوان و کامێران کەوتووەتەوە

 

ژینگەپارێزان دەڵێن، 30 ساڵیش دەبێت ئەو شوێنە ئاگری نەگرتووە، بەڵام ئەمساڵ سووتا. بەهۆی بارانی بەهارەوە، ئەمساڵ گژوگیا زۆر بووە و ئەمەش بووەتە مەترسی بۆسەر دارستانەکان. رۆژی دووشەممە، شاخی پشت گوندەکانی تیانە و سراوکام لە ناوچەی کامێرانیش سووتا. ئەوێش بە هەوڵی خەڵکی خۆبەخش و ژینگەپارێزان کوژێنرایەوە.

 

ئاگرەکانی ئەم ساڵ سەدان هێکتار دارستانیان سووتاندووە. ئەمە هۆکارێکی گرنگ بووە بۆ لەنێوبردنی دارستانەکانی زاگرۆس، بەڵام هۆکاری دیکەش هەن کە مەترسییان لەسەر پێنج ملیۆن و 500 هەزار دارستانی زاگرۆس دروست کردووە.

 

محەممەد دەروێش، سەرۆکی کۆمیتەی ژینگە لە یونسکۆ، گۆڕینی رێڕەوەکانی ئاو وەکو هۆکارێکی وشکبوونی دارستانەکان لە قەڵەم دەدات و دەڵێت، زۆر پڕۆژە بۆ گۆڕینی رووبارەکان جێبەجێ کراوە، کە کاریگەریی لەسەر زاگرۆس هەبووە، هەروەها ژمارەی مەڕوماڵات زۆر زیادی کردووە و کشتوکاڵ و باخداری لەنێو دارستانەکاندا پەرەی سەندووە کە ئەمە زاوزێی سرووشتی لە زاگرۆس لەنێو بردووە. دەشڵێت، لەلایەکی دیکەوە دروستکردنی خەڵووز و سوتاندنی بە ئەنقەستی دارستانەکان بۆ زەویی کشتوکاڵیش، زۆر زیاتر بووە.

 

دارستانەکانی زاگرۆس 40٪ـی ئاوی خواردنەوەی ئێران و رۆژهەڵاتی کوردستان دابین دەکەن، بەربەستێکی گەورەی سرووشتیی بەردەم خۆڵبارینەکانن و بەپێی راپۆرتە فەرمییەکان، سەرچاوەی ژیانی یەک ملیۆن و 500 هەزار کەسن، بۆیە لەنێوچوونیان کاریگەریی لەسەر کۆی ژینگەی مرۆیی و ئیکۆسیستمی ناوچەش دەبێت.

 

سەرەڕای ئەو گرنگییەی دارستانەکانی زاگرۆس هەیانە، زۆر کەس و لایەن بۆ بەرژەوەندیی تاکەکەسی خۆیان دەیانسووتێنن.