رووداو دیجیتاڵ
لە ئەنجامی وەرگەڕانی ئۆتۆمبێلێک لە سنووری شەقڵاوە هاونیشتمانییەک گیانی لەدەستدا و یەکێکی دیکەش بریندار بوو.
رووداوەکە رۆژی دووشەممە، 22-07-2024 لە نزیک تونێلی ماوەران روویدا. موحسین قەسرۆکی، بەڕێوەبەری راگەیاندنی نەخۆشخانەی شەقڵاوە بە رووداوی گوت، "دوو کەسیان هێنایە نەخۆشخانە کە یەکێکیان گیانی لەدەستدابوو و ئەوی دیکەش بریندار بوو".
ئەو کەسەی گیانی لەدەستداوە ناوی جەعفەر محەممەد تاهیرە و دانیشتووی شاری سۆرانە. موحسین قەسرۆکی دەڵێت، [جەعفەر محەممەد] پێشمەرگە بووە.
بریندارەکە لە شەقڵاوە چارەسەری پزیشکی وەردەگرێت و تەرمەکەش رەوانەی دادپزیشکی کراوە.
تاوەکو ئەمڕۆ ئاماری رووداوەکانی هاتووچۆی ساڵی رابردوو لە هەرێمی کوردستان بڵاونەکراونەتەوە، بەڵام بە گوێرەی ئاماری پۆلیسی هاتووچۆ، لە 2022دا لە هەرێمی کوردستان سێ هەزار و 706 رووداوی هاتووچۆ روویاندابوو و لە ئەنجامدا 445 کەس گیانیان لەدەستدابوو و حەوت هەزار و 250 کەسیش بریندار ببوون.
کۆمێنتەکان
وەک میوان کۆمێنتێك بنووسە یان وەرە ژوورەوە و هه‌موو خزمەتگوزارییەکان به‌كاربێنه
کۆمێنتێک دابنێ