دیمەنێک لە فڕۆکەخانەی نێودەوڵەتیی سلێمانی
رووداو دیجیتاڵ
جێگری لیژنەی گواستنەوە و گەیاندنی پەرلەمانی عێراق دەڵێت، هۆکاری داخستنی ئاسمانی تورکیا بەڕووی گەشتەکانی فڕۆکەخانەی سلێمانی "سیاسییە". دەشڵێت: "تورکیا هیچ بەڵگەیەکی بۆ سەلماندنی دزەکردنی پەکەکە بۆ نێو فڕۆکەخانەی سلێمانی نەخستووەتەڕوو."
رۆژی دووشەممە، 22-07-2024 کاروان یاروەیس، جێگری سەرۆکی لیژنەی گواستنەوە و گەیاندن لە پەرلەمانی عێراق، لە کاتی بەشداریکردنی لە بووڵتەنی نیوڕۆژی تۆڕی میدیایی روودا کە سەنگەر عەبدولڕەحمان پێشکێشیکرد، لەبارەی سەردانی مەیدانیی لیژنەکە بۆ ئەو فڕۆکەخانەیە رایگەیاند، پێویستە لێکتێنەگەیشتن و گومانەکانی تورکیا لەسەر فڕۆکەخانەکە بڕەوێنینەوە، بۆ ئەوەی سزاکان هەڵبگیرێن و گەشتەکانی ئاسایی ببنەوە.
لە 3ـی نیسانی 2023ـوە کۆمپانیای تورکیش ئێرلاین گەشتەکانی لە فڕۆکەخانەی سلێمانییەوە راگرتووە و ئاسمانی تورکیا بە ڕووی فڕۆکەخانەی سلێمانی دا داخراوە.
تاوەکو ئێستا چەندین جار بڕیارەکە لەلایەن تورکیاوە درێژکراوەتەوە؛ کاروان یاروەیس گوتی: ''بەلامانەوە گرنگە کە پەیوەندییەکی دۆستانەی باشمان لەگەڵ هەموو وڵاتانی دراوسێی هەرێمی کوردستان و عێراقدا هەبێت.''
لە هەمان کاتدا تورکیا رێگە نادات ئەو فڕۆکانەی دەچنە سلێمانی و ئەوانەی لە فڕۆکەخانەی سلێمانییەوە دەچنە فڕۆکەخانەکانی دیکە، بە ئاسمانی تورکیادا تێبپەڕن.
لەبارەی هۆکاری راگرتنەکەوە تورکیا دەڵێت، پەکەکە لە سلێمانی چڕبووەتەوە و ئەو رێکخراوە "دزەیکردووەتە نێو فڕۆکەخانە و ئەوەش هەڕەشەیە لە ئاسایشی گەشتە ئاسمانییەکانیان."
ئەو پەرلەمانتارە لە پشکی یەکێتیی نیشتمانیی کوردستان دەڵێت: ''هەر قسەیەک لەبارەی فڕۆکەخانەی سلێمانییەوە دەگوترێت، هیچ بنەمایەکی راستیی تێدا نییە، ئەوەی کە ئێمە تاوەکو ئێستا بیستوومانە، تەنیا راگەیێندراو و قسەی تووند بووە لەلایەن تورکیاوە، نەمانبینیوە داوا لە لایەنی عێراقی بکەن، دابنیشن و بەڵگەکانیان بۆ ئەم بابەتە بخەنەڕوو.''
کاروان یاروەیس گوتیشی: "لە پەرلەمانی عێراق کاتی پێشکێشکردنی راپۆرتی سەردانە مەیدانییەکەی لیژنەی گواستنەوە و گەیاندن رامانگەیاندووە، دەرگەی فڕۆکەخانەی سلێمانی کراوەیە و [حکومەتی تورکیا] دەتوانن لیژنەیەکی کراوە و بێلایەن راسپێرن، بۆ ئەوەی بەدواداچوون بۆ بابەتەکە بکەن.''
ئەو پەرلەمانتارەی پشکی یەکێتی لە پەرلەمانی عێراق ئەوەشی خستەڕوو، ''تورکیا کێشەی سیاسی لەگەڵ یەکێتیدا هەیە و فڕۆکەخانەی نێودەوڵەتیی سلێمانی تەنیا بۆ سزادانی سلێمانی بەکاردەهێنرێت.''
بەگوتەی کاروان یاروەیس، بۆ دەستپێکردنەوەی گەشتە ئاسمانییەکانی فڕۆکەخانەی نێودەوڵەتیی سلێمانی، حکومەتەکانی عێراق و هەرێمی کوردستان، سەرۆکایەتیی هەرێمی کوردستان، پەرلەمانی کوردستان، دەسەڵاتی فڕۆکەوانیی مەدەنی و سەرجەم دامەزراوە پەیوەندیدارەکان "کەمتەرخەم بوون و هیچ هەنگاوێک بۆ چارەسەرکردنی کێشەکە نەنراوە.''
جێگری لیژنەی گواستنەوە و گەیاندنی پەرلەمانی عێراق پێیوایە، عێراق دەتوانێت لەسەر بابەتەکە گفتوگۆ لەگەڵ تورکیا بکات، چونکە سەرەڕای ئەوەی دەسەڵاتی فڕۆکەوانیی مەدەنی سەر بە عێراقە، بەڵام خۆی بەشێک نییە لە کێشەکە و دەتوانێت وەکو لایەنی سێیەم لە نێوان تورکیا و سلێمانیدا بێت.
کاروان یاروەیس کێشەکە بە سیاسی دەزانێت و دەڵێت: ''چارەسەرکردنی کێشەی فڕۆکەخانەی نێودەوڵەتیی سلێمانی لە رێگەی دانوستاندنی دەوڵەت لەگەڵ دەوڵەت یان پەیوەندیی کەسیی نێوان سەرۆکەکانی دوو وڵاتەکە دەکرێت.''
بەرپرسانی باڵای یەکێتی و حکومەتی هەرێمی کوردستان [قوباد تاڵەبانی، جێگری سەرۆکوەزیران] چەندین جار بۆ کردنەوەی ئاسمانی تورکیا بۆ گەشتەکانی فڕۆکەخانەی سلێمانی لەگەڵ بەرپرسانی تورکیا کۆبوونەتەوە، بەڵام نەگەیشتوونەتە رێککەوتن.
رۆژی 22-4-2024 رەجەب تەیب ئەردۆغان، سەرۆککۆماری تورکیا سەردانی بەغدا و دواتریش سەردانی هەولێری کرد و لەگەڵ بەرپرسانی باڵای عێراق و هەرێمی کوردستان کۆبووەوە، بەڵام دوای سەردانەکەی ئەردۆغانیش هیچ گۆڕانکارییەک بەسەر بڕیاری داخستنی ئاسمانی تورکیا بۆ گەشتەکانی فڕۆکەخانەکەدا نەهات.
هەروەها رۆژی هەینی 12-7-2024 ئەردۆغان، دوای تەواوبوونی لووتکەی ناتۆ لە ئەمریکا رایگەیاند: ''ئەگەر بەرپرسانی سلێمانی مەودایەک لەنێوان خۆیان و پەکەکە دانەنێن، گەمارۆکان بەردەوام دەبن.''
کاروان یاروەیس دەڵێت، رێگە نادەن بەهۆی پەکەکە یان هەر لایەنێکی دیکە فڕۆکەخانەی سلێمانی سزا بدرێت. گوتیشی: ''پەیوەندیی نێوان پەکەکە و یەکێتی لە نێوخۆ و لە تورکیا لێکدانەوەی خراپی بۆ کراوە، پەیوەندیی دۆستانەی یەکێتی لەگەڵ هێزەکانی پارچەکانی دیکەی کوردستان شتێکە و ئەوەی کە پەیوەندییەکە بەوشێوەیە وێنا بکرێت کە ئێمە و پەکەکە شەو و رۆژ پێکەوەین و هەموو شتێکمان یەکێکە، شتێکی دیکەیە و لە بنەمادا هەڵەیە.''
ئەو پەرلەمانتارە نایشارێتەوە [وەکو یەکێتی] پەیوەندیی دۆستانەیان لەگەڵ سەرجەم هێزەکانی پارچەکانی دیکەی کوردستان هەیە، بەڵام لە چوارچێوەی چارەسەرکردنی سیاسییانەی کێشەکانیان هاوکارییان دەکەن، لە رووی سەربازییەوە دژی وڵاتێکی دراوسێ هاوکاریی هیچ هێزێکی پارچەکانی دیکەی کوردستان ناکەن.
کۆمێنتەکان
وەک میوان کۆمێنتێك بنووسە یان وەرە ژوورەوە و هه‌موو خزمەتگوزارییەکان به‌كاربێنه
کۆمێنتێک دابنێ