لە مێردین گەنجێک بە چەقۆ کوژرا

 

کاژێر 22:00ی شەوی 21ی نیسانی 2023، لە تێرمیناڵی پاسە گەشتیارییەکان لە شارۆچکەی نسێبین لە مێردینی باکووری کوردستان، بەبێ زانینی هۆکارەکە، دەمەقاڵێ لەنێوان دوو گرووپی گەنج روویدا، پاشان گرژی تێکەوت و بۆ شەڕە چەقۆ پەرەیسەند. 

 

لە ئەنجامی شەڕەکەدا دوو گەنج بەناوەکانی "ئەحمەد بیلەک" کە تەمەنی 18 ساڵە و "عەبدولڕەحمان ئاکن"ی تەمەن 19 ساڵ بەسەختی برینداربوون. 

 

دوای ئاگادارکردنەوەی پۆلیس و لایەنە تەندروستییەکان، هەردوو گەنجە بریندارەکە بە ئەمبووڵانس گەیێندرانە نەخۆشخانەی گشتیی مێردین، بەڵام سەرباری هەوڵی زۆری پزیشکان، ئەحمەد بیلەک گیانی لەدەستدا و عەبدولڕەحمان ئاکن-یش لە ژێرچاودێری چڕی نەخۆشخانەکەدایە و دۆخی تەندروستیی ناسەقامگیرە. 

 

تاوەکو ئێستا هۆکاری شەڕە چەقۆی گەنجەکان دیارنییە، بۆ ئەو مەبەستەش پۆلیس لێکۆڵینەوەی دەستپێکردووە و بڕیاری دەستگیرکردنی بۆ شەش کەس دەرکردووە.