ژمارەیەک کرێکاری بەنگلادیشی لەبەردەم باخی گشتیی سلێمانی. وێنە: رووداو
رووداو - سلێمانی
پاش مانگێک بەڕۆژووبوون و کاری سەختی رۆژانەیان، لە یەکەم رۆژی جەژنی رەمەزاندا کرێکارە بەنگلادیشییەکان لە سلێمانی لەنێو پارکێکی نزیک شوقەکانیان جەژنە پیرۆزەیان لە یەکدی کرد و بە مۆبایلەکانیان هەواڵی خێزانەکانیشیان لە وڵاتەکەیان پرسی.
عەبدولڕەزاقی 39 ساڵان سێ ساڵە خێزانەکەی لە بەنگلادیش جێهێشتووە و بۆ کار هاتووەتە سلێمانی، بە تەلەفۆن جەژنە پیرۆزە لە کوڕەکەی دەکات و هەواڵی خێزانەکەی دەپرسێت. ئەو دەڵێت، "لەگەڵ کوڕەکەم قسەم کرد، گوتی: دوێنێ چووم بۆ بازاڕ، پێویستیمان بۆ جەژن کڕی، ئەمڕۆش بەڕۆژووم و سبەینێ لە بەنگلادیش جەژنە، هەموومان باشین و هیچ کێشەیەکمان نییە."
محەممەد یارحوسێنیش پێنج ساڵە لە سلێمانییە، رۆژانی جەژنی بە گەڕان و پیاسەکردن لەگەڵ هاوڕێکانی بەسەربرد، دەڵێت، "لە هەموو عێراق برادەرم هەیە و زۆر باشە، جەژنە پیرۆزە لە هەمووان دەکەم، چونکە هەموومان وەکو براین، پێکەوە دەچینە دەرەوە و کاتێکی خۆش لەگەڵ هاوڕێکانمان بەسەردەبەین و پیاسە دەکەین."
محەممەد شەمیم، کرێکاری بەنگلادیشی لە سلێمانی جەژنە پیرۆزە لە هەمووان دەکات و دەڵێت، "عێراق بۆ ئێمە زۆر باشە و هیچ کێشەمان نییە، هەموو برادەرەکانمان پێکەوەین، پێکەوە دەڕۆینە دەرەوە و پیاسە دەکەین، دواتر دەچینە بازاڕ گۆشت دەکڕین و دەچین لە ماڵەوە دەیخۆین."
نزیکەی 37 هەزار کرێکاری بیانی لە هەرێمی کوردستان هەن، زۆرینەی ئەوانەی لە سلێمانی دەژین لە رۆژانی پشوویاندا دەچنە بەردەم باخی گشتیی سلێمانی و یەکدی دەبینن، لە یەکەم رۆژی جەژنیشدا کە پشوویانە بە هەمان شێوە لەوێن و جەژنە پیرۆزە لە یەکدی دەکەن.
بەردەم باخی گشتیی سلێمانی شوێنی یەکدی بینین و پشوودانی زۆربەی کرێکارە بیانییەکانە. ئەمین هومایۆن، کرێکاری بەنگلادیشی لە سلێمانی باس لەوە دەکات، "ئەمڕۆ نانم بۆ خۆم دروستکرد و خواردم، ئێستاش بۆ پیاسەکردن هاتم بۆ باخی گشتی، چونکە هەمووان لێرە یەکدی دەبینین، خەڵکی ئێرەش زۆر باش و بەڕێزن، هیچ کێشەمان نییە."
جەژنی کرێکارە بیانییەکان جیاوازە لە جەژنی هاونیشتمانییان، لە لایەک زۆرینەیان یەک رۆژ پشوویان هەیە، لە لایەکیش تەنیا بە مۆبایل جەژنە پیرۆزە لە خێزانەکانیان دەکەن.
کۆمێنتەکان
وەک میوان کۆمێنتێك بنووسە یان وەرە ژوورەوە و هه‌موو خزمەتگوزارییەکان به‌كاربێنه
کۆمێنتێک دابنێ