قوتابییەکی پۆلی 12 لە بەردەڕەش گیانی لەدەستدا

 

قوتابییەکە ناوی سوهەیب ئومێد بوو و ئێوارەی ئەمڕۆ (شەممە، 22-4-2023) لە گوندی مۆریلان گیانی لەدەستدا. ئامۆزایەکی بەناوی سایب عەبدوڵڵا بە تۆڕی میدیایی رووداوی راگەیاند، "سوهەیب تەمەنی 18 ساڵە و کۆتایی بە ژیانی خۆی هێناوە". 

 

بە گوتەی سایب عەبدوڵڵا، ئامۆزاکەی هیچ کێشەیەکی نەبووە و دوای ئەوەی دایک و باوکی چوونەتە ماڵی کەسێکی نزیکیان بەمەبەستی جەژنە پیرۆزە، بەتەنیا لە ماڵەوە ماوەتەوە و بە چەک خۆی کوشتووە. 

 

بەشار محەممەد، بەڕێوەبەری ناحیەی دارەتوو لەمبارەوە بە رووداوی گوت، قوتابییەکە هیچ کێشەیەکی نەبووە، بەڵام وا دیارە بەهۆی خوێندنەوە کێشەی دەروونی بۆ دروستبووە. 

 

ئەمە لەکاتێکدایە بڕیارە رۆژی 3-6-2023 تاقیکردنەوەی وەزاری پۆلی 12 دەستپێبکات و 27ـی هەمان مانگ تەواو دەبێت. 

 

بەشار محەممەد گوتیشی، بنکەی پۆلیسی دارەتوو پەڕاوی لێکۆڵینەوەی بۆ رووداوەکە کردووەتەوە و خەریکی بەدواداچوونن.

 

تەرمی ئەو هاونیشتمانییە لە دادپزیشکی دهۆک توێکاری بۆ کراوە و رادەستی کەسوکاری کراوەتەوە و لە گوندی مۆریلان بە خاک دەسپێردرێت.