زیاتر لە 3000 کەس لە پاککردنەوەی ماڵەکانی دهۆک لە پاشماوەی لافاوەکە بەشدارن

 

 

بەهۆی لافاوی چەند رۆژی رابردوو لە چەند گەڕەکێکی دهۆک، پاشماوەیەکی زۆر و قوڕ و لیتە لەنێو بەشێکی زۆر لە ماڵەکان کۆبووەتەوە؛ زیاتر لە سێ هەزار کەس و 80 ئامێری گەورە لە هەڵمەتی پاکژکردنەوەی پاشماوەی لافاوەکە بەشدارن.

 

نورمان عەلی، دەروونناس لە هەڵمەتەکە وەکو خۆبەخش بەشدارە و دەڵێت، ئەمە ئەرکێکی مرۆڤانەیە و ئەمڕۆ لەگەڵ ئێش و ئازاری گەلەکەیەتی.

 

بەشداربووانی هەڵمەتی پاکژکردنەوەی پاشماوەکانی لافاوەکە تەنیا خەڵکی سەنتەری شاری دهۆک نین، بەڵکو لە ناوچەکانی دەوروبەری شارەکەشەوە خەڵک بە خۆبەخشی چوون بۆ هاوکاریی خەڵکی لێقەوماو.

 

هیوا محەممەد ئەمین، مامۆستا دەڵێت، "وەکو گەنجێکی خۆبەخش لە قەزای بەردەڕەشەوە بە خۆشحاڵییەوە ئەمڕۆ ھاتین بەشداری بکەین لە خاوێنکردنی ماڵەکانی دھۆک؛ خەڵکی ئێرە خەڵکی خۆمانە، شاری خۆمانە، بە خۆشحاڵییەوە کۆمەڵێک گەنجی خۆبەخش لە بەیانییەوە لە کاژێر 08:00ـەوە، ماڵەکان خاوێن دەکەینەوە تاوەکو ئەو کاتەی کۆتایی بە بەرنامەکە دێت ئێمە لێرە دەمێنینەوە."

 

بە گوتەی سەرپەرشتیاری هەڵمەتی پاکژکردنەوەکە، لە رۆژێکدا زیاتر لە 80%ی پاشماوەی لافاوەکەی دهۆکیان پاککردووەتەوە.