رووداو دیجیتاڵ
دوای کۆتاییهاتنی رێوڕەسمی ئاهەنگی نەورۆزی ئامەد، هێزە ئەمنییەکان 204 کەسیان بە تۆمەتی بانگەشەکردن بۆ پارتی کرێکارانی کوردستان-پەکەکە، دەستگیرکرد.
کۆمەڵەی پارێزەرانی ئازاد، کە رێکخراوێکی ناحکومییە و بە نزیک لە دەم پارتی دەناسرێت لە راگەیێندراوێکدا بڵاویکردەوە، تۆمەتی سەر ئەو کەسانەی دەستگیرکراون "بانگەشەکردن بۆ پەکەکە و گوتنەوەی درووشمی پەسنکردنی عەبدوڵڵا ئۆجەلان" بووە.
رێوڕەسمی ئاهەنگی جەژنی نەورۆز لە گۆڕەپانی گەورەی شارۆچکەی رێزان لە ئامەد بەڕێوەچوو و نزیکەی نیو ملیۆن کەس بەشداربوون.
کۆمەڵەی پارێزەرانی ئازاد راشیگەیاندووە، دوای ئەوەی پارێزەرەکانیان چوونەتە سەر هێڵ و چوونە ئەو بنکەی پۆلیس و ناوەندانەی جەندرمە، کە دەستگیرکراوەکانی لێبوون، دوای هەوڵێکی زۆر و وەرگرتنی گوتەکانیان، 38 کەسیان کە ژن و منداڵ بوون، ئازاد کران.
بەوپێیە، ئێستا 166 کەس بە تۆمەتەکانی بانگەشەکردن بۆ پەکەکە و پەسنکردنی عەبدوڵڵا ئۆجەلان و پۆشینی جلوبەرگی هاوشێوەی گەریلاکان، دەستبەسەرکراون و چاوەڕوان دەکرێت دوای وەرگرتنی گوتەکانیان و پڕکردنەوەی بەڵێننامە، ئازاد بکرێن.
کۆمەڵەکە جەخت لەوە دەکاتەوە کە هەوڵەکانیان چڕ دەکەنەوە بۆ ئازادکردنی سەرجەم گیراوان.
پێشتر، وەزارەتی ناوخۆی تورکیا رایگەیاندبوو، بۆ رێوڕەسمی ئاهەنگی جەژنی نەورۆزی ئەم ساڵ، حەوت هەزار و 500 پۆلیس و کارمەندانی هێزە ئەمنییەکان، ئاسایشی گۆڕەپانەکە و سەلامەتی هاووڵاتییان دەپارێزن.
لە چەند رۆژی رابردوودا، بەهۆی ئاهەنگەکانی جەژنی نەورۆز لە چەند پارێزگایەکی تورکیا و باکووری کوردستان، 364 کەس دەستگیرکرابوون. لە ئاهەنگی نەورۆزی ئیستەنبووڵ، 75 کەس و لە ئیزمیر 61 کەس دەستگیرکرابوون.
کۆمێنتەکان
وەک میوان کۆمێنتێك بنووسە یان وەرە ژوورەوە و هه‌موو خزمەتگوزارییەکان به‌كاربێنه
کۆمێنتێک دابنێ