هەڵەیەک روویدا! دووبارە هەوڵبدە
کورد، لەم پرسەدا کۆدەنگ و هاوڕان و پشتئەستوورن بە بڕیارێکی دادگای فیدراڵی
رووداو دیجیتاڵ
لایەنی عەرەبی و تورکمانی لە کەرکووک، ناکۆکیی نێوانیان وەلانا و لەپاڵ یەکدییەوە وەستان و داوای هەمواری مادەی 35ـی هەڵبژاردنی ئەنجوومەنی پارێزگاکان دەکەن و دەیانەوێت هەر کوردێکی کەرکووک کە بە تەعریب دەرکراوە، مافی دەنگدانی نەبێت، بەڵام کورد لەمەدا یەکدەنگن و دژی ئەو هەڵوێستەیانن.
محەممەد سەمعان، گوتەبێژی بەرەی تورکمانی گوتی "پێش هەڵبژاردن، دەبێ چاو بە یاسای هەڵبژاردنەکاندا بخشێندرێتەوە، مادەی 35 هەمواربکرێتەوە و کاری پێ نەکرێت. (ئەو مادەیە) لە لایەن عەرەب و تورکمانەوە رەتکراوەیە".
ئەو دوو لایەنە کە چوونەتە بەرەیەکەوە دژی کورد، مەرجێکی دیکەیان ئەوەیە؛ ئەنجامی هەڵبژاردنی ئەنجوومەن نەکرێتە پێوەر بۆ دانانی پۆستەکان و یەکلاکردنەوەی چارەنووسی پارێزگاکە.
حاتم تائی، گوتەبێژی هاوپەیمانی عەرەبی لە کەرکووک دەڵێ "ئەو لیستە ساختەی زۆری تێدایە، یاری زۆری تێدا کراوە، یاریکردنەکان لە 2005ـەوە تاوەکو 2017 بووە و، ناوی هەزاران دەنگدەری تێدایە کە خەڵکی کەرکووک نین، ئەوەش دەستبردنە بۆ مافی خەڵکی کەرکووک".
لە ئەگەری جێبەجێکردنی مەرجی لایەنی عەرەبی و تورکمانی، زیاتر لە 40 هەزار دەنگدەری کورد، لە دەنگدان بێبەش دەبن.
کورد، لەم پرسەدا کۆدەنگ و هاوڕان، پشتئەستوورن بە بڕیارێکی دادگای فیدراڵی، کە لە ساڵی 2019 ئەو داواکارییەی عەرەب و تورکمانی رەتکردبووەوە و بڕیاری یەکلاکەرەوەی لەسەر داوە.
عەلی قەڵایی، لێپرسراوی سەنتەری هەڵبژاردنی کەرکووک - سەڵاحەدینی یەکێتی سەبارەت بە بڕیارەکەی پێنج ساڵ لەمەوبەری دادگای فیدراڵی دەڵێ "سکاڵاکەی ئێمە وەڵامەکەی هاتەوە، سکاڵاکەمان بەهەند وەرگیرا و دادگای فیدراڵی بڕیاریدا بە هەڵوەشاندنەوەی ئەو بڕگانە، لەبەرئەوەی ئەمە لەگەڵ بنەماکانی مافی مرۆڤ و ماددەی 140 یەکناگرێتەوە. بڕیارەکە لە ساڵی 2019 دەرچووە و خۆشبەختانە ئەوەی ئومێدمان پێی هەیە و پشتیوانمانە ئەو بڕیارەی دادگای فیدراڵییە".
بەهۆی راگواستنی کورد لە سەردەمی سەدام حوسێن و شێواندنی جوگرافیای ئیداریی پارێزگای کەرکووک، بەشێکی زۆر لە دەنگدەرانی کورد کە ناسنامەیان هی ئەو سنوورانەیە، لە دەستکاریکردنەکەدا لە پارێزگاکە جیاکراونەتەوە، بەڵام نیشتەجێی کەرکووکن و فۆڕمی خۆراکیان هەر سەر بەو پارێزگایەیە.
کۆمێنتەکان
وەک میوان کۆمێنتێك بنووسە یان وەرە ژوورەوە و هه‌موو خزمەتگوزارییەکان به‌كاربێنه
کۆمێنتێک دابنێ