بەهۆی ئاگرکەوتنەوە لە سۆران پێنج ماڵ دەسووتێن
رووداو دیجیتاڵ
ئێوارەی ئەمڕۆ لە گەڕەکی بەختیاریی سۆران ئاگر لە ماڵێک دەکەوێتەوە و بەهۆیەوە چوار ماڵی دیکە دەسووتێن کە لە ئەنجامدا کەسێک بریندار بوو.
شایەتحاڵێک لەنێو پاشماوەی سووتاوی یەکێک لە ماڵەکان قسەی بۆ پەیامنێری رووداو کرد و ئاماژەی بەوەکرد، کاتێک ئەو وەکو یەکەم کەس چووەتە سەر شوێنی ئاگرەکە بینیویەتی بەهۆی بوتڵی گازەوە بووە. هاوکات بەرگریی شارستانیی سۆرانیش دەڵێت: بەهۆی شۆرتی کارەباوە بووە.
خاوەنی یەکێک لە ماڵە سووتاوەکان کە کارمەندی شارەوانیی سۆرانە ئاماژەی بەوەکرد، "هیچمان بۆ دەرنەچووە." خاوەنی خانوویەکی دیکەش گوتی، "کرێچین و چاومان لە حکومەت و خێرخوازانە تاوەکو بتوانین ماڵەکانمان دروست بکەینەوە."
پەیامنێری رووداو دەڵێت: ئەو خانووانەی گڕیان گرتووە، رووبەریان بچووکە و لەنێوان 80 بۆ 100 مەتردان. هۆکاری زیاتر تەشەنەسەندنی گڕەکەش، بەهۆی بەرمیلێک نەوت بووە.
خاوەنی ماڵەکان و شایەتحاڵەکان باسی ئەوەشیان کرد کە لەکاتی ئاگرکەوتنەوەکە خەڵک لەنێو ماڵەکاندا هەبوو و لەلایەن خەڵک و تیمەکانی بەرگریی شارستانی رزگارکراون. لەنێو ئەوانەی رزگارکراون، منداڵیش هەبوون.