بەفربارین لە باکووری کوردستان
رووداو دیجیتاڵ
رێگەی 448 گوند لە باکووری کوردستان بە هۆی بەفرەوە داخرا.
بەفربارین بە شێوەیەکی چڕ لە گوندەواری پارێزگاکانی ئەرزەڕۆم، ئاگری، ئەردەخان و قەرس بەردەوامە و لە پارێزگانی دیکەی باکووری کوردستانیشدا بەفری زۆر باریوە.
لەو ناوچانەدا بەفر کەڵەکە بووە و رێگەی 448 گوند بەڕووی هاتووچۆ داخراوە. ئەمە لەکاتێکدایە 257 لەو گوندانە دەکەونە سنووری پارێزگای ئەرزەڕۆم. تیمەکانی شارەوانی و بەرگریی شارستانیی ئەو پارێزگایانە لە هەوڵی راماڵی بەفر و کردنەوەی رێگەکانن.
بەشێک لەو رێگەیانە بە زەحمەتیش بێت بەشێک لە هاونیشتمانییان پێیدا تێدەپەڕن، بەڵام رێگەی 121 گوندی ئاگری، 53 گوندی ئەردەخان و 17 گوندی قەرس بە تەواوی بە بەفر داخراون. ئەگەرچی لە پارێزگاکانی دیکەدا ناوەندی شارەکان لە دۆخێکی باشتردان و بەفری کەمتر باریوە، بەڵام قەرس بە تەواوەتی کەوتووەتە ژێر کاریگەریی بەفر و زۆربەی شوێنەکانی ناوەندی پارێزگاکەش سپیپۆشن.
رۆژی سێشەممە، قایمقامی قەرس لە راگەیێنراوێکدا باسی لە کاریگەرییەکانی بەفر و شەختە کردبوو و پشووی رۆژێکی (21-2-2023) بۆ تەواوی قوتابخانەکانی سنوورەکەی راگەیاندبوو.
بەیانیی ئەمڕۆ چوارشەممە، پلەی گەرما لە ئاگری 1ی ژێر سفری سەدییە و بە شەو دەبێتە 7ی ژێر سفر. هەروەها پلەی گەرما لە ئەردەخان بە رۆژ سفر و بە شەو دەبێتە 8ی ژێر سفر. لە قەرس پلەی گەرما 1ی سەدییە و شەو دەبێتە 13ی ژێر سفری سەدی. لە پارێزگای ئاگریشدا بە رۆژ 1 پلە و بە شەو دەبێتە 7 پلەی ژێر سفر.
کۆمێنتەکان
وەک میوان کۆمێنتێك بنووسە یان وەرە ژوورەوە و هه‌موو خزمەتگوزارییەکان به‌كاربێنه
کۆمێنتێک دابنێ