رووداو دیجیتاڵ
لە پارێزگای سێواس-ی باکووری کوردستان لە رووداوێکی هاتووچۆدا لەنێوان پاسێک و ئۆتۆمبێلێکی تایبەت 26 کەسی برینداربوون.
بەیانی رۆژی دووشەممە، 22ـی کانوونی دووەمی 2024، لەسەر رێگەی سەرەکیی نێوان هەردوو شارۆچکەی زارا- سوشەهری سەر بە پارێزگای سێواس لە باکووری کوردستان، پاسێکی نەفەرهەڵگر خۆی بە ئۆتۆمبێلێک کێشا. بەهۆیەوە 26 کەسی سەرنشینی پاس و ئۆتۆمبێلەکە برینداربوون.
بەڕێوەبەرایەتیی پۆلیسی هاتووچۆی سێواس، هۆکاری رووداوەکەی بۆ خلیسکان و لە کۆنترۆڵ دەرچوونی پاسەکە گەڕاندەوە کە لە نزیک پێچی سەرەکیی گوندی بۆزکڕ لە رێڕەوی خۆی دەرچوو و لە ئەنجامدا رووداوێکی مەترسیداری لێکەوتەوە.
دوای رووداوەکە، ژمارەیەکی زۆر ئەمبوڵانس روویانکردە شوێنی رووداوەکە و سەرجەم بریندارەکان گواسترانەوە نزیکترین نەخۆشخانەی شارەکە. هەشت لە بریندارەکان تەندروستییان ناجێگیرە.
رۆژی 9ـی تشرینی دووەمی 2023، بەڕێوەبەرایەتیی گشتیی هاتووچۆی تورکیا، ئاماری 10 مانگی رووداوەکانی هاتووچۆ لە باکووری کوردستان و تورکیا بڵاوکردەوە و رایگەیاند، 461 هەزار و 10 رووداوی هاتووچۆ روویانداوە؛ بەهۆیەوە دوو هەزار و 525 کەس گیانیان لەدەستداوە و 300 هەزار و 281 کەسی دیکەش برینداربوون.
بە گوێرەی ئامارە فەرمییەکان، ساڵی 2022 لە باکووری کوردستان و تورکیا 485 هەزار و 48 رووداوی هاتووچۆ روویانداوە و دوو هەزار و 282 کەس گیانیان لەدەستداوە و 291 هەزار و 151 کەسی دیکەش برینداربوون.
کۆمێنتەکان
وەک میوان کۆمێنتێك بنووسە یان وەرە ژوورەوە و هه‌موو خزمەتگوزارییەکان به‌كاربێنه
کۆمێنتێک دابنێ