ئەو دوو هاوژینەی چوارقوڕنە کە لە ماڵەکەیاندا ئاگر کەوتەوە و ژنەکە گیانی لەدەستدا
رووداو دیجیتاڵ
ماڵی هێدی ئەنوەر لە شارۆچکەی چوارقوڕنە سووتا؛ ئاگرەکە کاژێر 08:00ی بەیانیی رۆژی یەکشەممە، بەهۆی شۆرتی کارەباوە بووە و هاوژینە دووگیانەکەشی کە تەمەنی 26 ساڵ بوو، گیانی لەدەستدا.
هێدی ئەنوەر، هاوژینی قوربانییەکەیە و دەڵێت: کاتێک لەخەو هەڵسام لەناو دووکەڵی ئاگرەکەدابووم، دراوسێکانم بەدیوارەکەیاندا دەکێشا، دڵنیابووم هاوسەرەکەم رایکردووەتە دەرەوە، تاوەکو چووم بانگی خەڵک بکەم فریام بکەون ئاگرەکە زیادیکرد و نەمزانی هاوسەرەکەم لە ژوورەوەیە گیانی لەدەستدا.
موسلیح ساڵح، باوکی ئەو ژنەیە کە بەهۆی ئاگرەکەوە گیانی لەدەستدا و دەڵێت، لە ماوەی دوو ساڵی هاوژینییان ئەوە چوارەم جارە ماڵی کچەکەم دەسووتێت.
موسلیح ساڵح باسی لەوە کرد: دراوسێکەمان گوتی، وەرە ماڵی کچەکەت سووتا، بەپێخواسی رامانکرد، ئاگرەکە زۆربوو نەمانتوانی بچینە ژوورەوە، زۆر هەوڵمدا هەموو سەر و گوێم سووتا، بەداخەوە کچەکەم گیانی لەدەستدا.
بەهۆی گڕی ئاگرەکەوە سەقفی خانووەکە کە دارە گڕی گرتووە و رووخاوە. عەلی قادر، گوتەبێژی بەرگریی شارستانیی راپەرین بە رووداوی گوت: هۆکاری رووداوەکە شۆرتی کارەبا بووە، دوای ئەوەی تیمەکانمان دەگەنە شوێنی رووداوەکە بەداخەوە ئافرەتێکی دووگیان گیانی لەدەستداوە.
هێدی ئەنوەر و ئاشتی موسڵیحی هاوژینی دوو ساڵ بوو ژیانی هاوبەشیان پێکهێنابوو، لەبەر خراپی باری داراییان لە خانوویەکی گڵدا کە مانگانە بە 120 هەزار دینار بەکرێیان گرتبوو دەژیان.
کۆمێنتەکان
وەک میوان کۆمێنتێك بنووسە یان وەرە ژوورەوە و هه‌موو خزمەتگوزارییەکان به‌كاربێنه
کۆمێنتێک دابنێ