لە رۆژهەڵاتی کوردستان بە نهێنی یادی دامەزراندنی کۆماری کوردستان کرایەوە

 

هێزەکانی ئێران رێگە نادەن، خەڵک سەردانی گڵکۆی سەرۆکی کۆماریش بکەن، بەڵام هەموو ئەو رێگرییانە بەربەست نین لە بەردەم یادکردنەوەی.

 

مامۆستا ئیبراهیم کەریمی، پێشنوێژی مزگەوتی نەنەڵەی سنە دەڵێت: ناوی پێشەوا قازی محەممەد هەتا هەتایە لە دڵی هەموو مرۆڤێکی ئازادیخوازدا بە بەرزی دەمێنێتەوە و لەبیری ناکەین. 

 

کۆماری کوردستان بە ئەنجام گەیشتنی هەوڵ و خەباتی گەلی کورد بوو لە بارودۆخی ئاڵۆزی دوای شەڕی جیهانیی دووەم. ئاڵوگۆڕە ناوچەیی و نێودەوڵەتییەکان، خواستی تاران بۆ زاڵکردنەوەی دەسەڵاتی بەسەر هەموو ناوچەکاندا و لاوازییە نێوخۆییەکان بوون، بەهۆی ئەوەی کۆماری کوردستان کەمتر لە ساڵێک دوای دامەزراندنی، شکست بهێنێت. 

 

ناوەندی هاوکاریی حیزبەکانی کوردستانی ئێران لە راگەیێندراوێکدا بە بۆنەی 77ـەمین ساڵیادی کۆماری کوردستان دەڵێت، بە فەرمی ناساندنی ئاڵای کوردستان، داهێنانی سروودی نەتەوەیی و چەمکی پێشمەرگە لە کۆماری کوردستاندا، بۆشاییەکانی بزووتنەوەی رزگاریخوازی کوردی پڕکردووەتەوە. 

 

وەک لە راگەیێندراوەکەدا هاتووە، لە کۆماری کوردستاندا رێز لە جیاوازییە نەتەوەیی، زمانی و ئایینییەکان و ئازادی رادەربڕین دەگیرا. گرنگی بە بووژاندنەوەی کولتوور و هونەر، خوێندنی بێبەرامبەر و خوێندنی کچان دا و مافی خوێندن بە زمانی دایک بۆ کەمینە زمانییەکانیشی بە فەرمی ناساند. 

 

کارێکی دیکە کە لە سەردەمی کۆماری کوردستاندا کرا، لێکنزیکبوونەوە و هاوکاری بوو لەگەڵ گەل و حکومەتی ئازەربایجان. هاوکارییەک کە دواتر درێژەی نەکێشا و ناکۆکی و کێشەشی لێکەوتەوە.