بەهۆی بەفربارینەوە لە 11 شاری کرماشان خوێندن کرایە ئۆنلاین

 

 

لە کۆبوونەوەی بەپەلەی رۆژی هەینی، 20/12/2024ی یەکەی بەرەنگاربوونەوەی قەیرانی پارێزگای کرماشان بە سەرپەرشتی پارێزگار، بڕیاردرا ئەمڕۆ شەممە قوتابیان لەو پارێزگایە، جگە لە شارەکانی قەسری شیرین، سەرپێڵی زەهاو و گیەڵان، نەچنە قوتابخانە و ئۆنلاین وانەکانیان بخوێنن. 

 

پارێزگای کرماشان رایگەیاند: "بەهۆی دابەزینی پلەی گەرما و بە مەبەستی کەمتر بەکارهێنانی گاز و کارەبا لە قوتابخانەکانی شارەکانی کرماشان، وانەکان بە شێوەی ئونلاین دەخوێندرێن، جگە لە سێ شاری رۆژئاوای ئەم پارێزگایە".

 

لە پاریزگاکانی سنە و ورمێش لە شەوی هەینییەوە بەفربارین دەستی پێکردووە و لە زۆربەی رێگەکانی ئەو دوو پارێزگایە ئاستەنگی هاتووچۆ دروستبووە. لە پارێزگای سنە بۆ 6 رۆژ خوێندن بە شێوەی ئۆنلاین دەبێت.

 

بەپێی کەشناسی ئێران، ئەم شەپۆلی بەفر و بارانە ئێوارەی ئەمڕۆش پارێزگاکانی ئیلام و لوڕستان لە رۆژهەڵاتی کوردستان دەگرێتەوە.

 

کەشناسی ئێران دەڵێت، ئەم شەپۆلی بەفربارینە 26 پارێزگای ئێران دەگرێتەوە و تاوەکو رۆژی سێشەممە بەردەوام دەبێت.