رووداوێکی هاتووچۆ لە ورمێ گیانلەدەستدانی کەسێک و برینداربوونی 20ـی دیکەی لێکەوتەوە

 

 

لەسەر رێگەی سێرۆ لە ورمێ، بارهەڵگرێک خۆی بە چەند ئۆتۆمبێلێکدا کێشاوە و بەپێی زانیارییە سەرەتاییەکان لانیکەم کەسێک گیانی لەدەستداوە و 20ی دیکەش بریندار بوون، هەروەها چەند سەرنشینێک تاوەکو ئێستا لەنێو ئۆتۆمبێلەکاندا ماون و دەرنەهێنراون. 

 

رووداوەکە دوای وەرگەڕانی ئۆتۆمبێلێکی تایبەت و دروستبوونی قەرەباڵخی روویداوە، کاتێک ژمارەیەک ئۆتۆمبێلی دیکە بۆ هاناوەچوونی رادەوەستن و قەرەباڵخی دروست دەبێت، بارهەڵگرێک سیستمی ستۆپی لەکاردەکەوێت و خۆی دەکێشێت بە ئۆتۆمبێلەکاندا.

 

رەزا پەناهی موقەدەم، بەڕێوەبەری پۆلیسی هاتووچۆی پارێزگەی ورمێ دەڵێت، "12 ئۆتۆمبێل لەو رووداوەدا زیانیان بەرکەوتووە. تاوەکو ئێستا کەسێک گیانی لەدەستداوە و 20 کەسی دیکەش بریندارن، بەڵام ئەگەری بەزربوونەوەی ژمارەی گیانلەدەستدان هەیە."

 

بەگوێرەی زانیارییەکانی رووداو، بەرکەوتووانی رووداوەکە خەڵکی گوندەکانی گەنگەچین، سنجی و بالۆی ورمێن.

 

مانگی سووری پارێزگەی ورمێ رایگەیاند، بارهەڵگرێک ستۆپی نەماوە و خۆی کێشاوە بە ئۆتۆمبێلێکدا و دواتر لە شوێنی رووداوەکە 12 ئۆتۆمبێل بەیەکیانداکێشاوە.